Comments Add Comment

दूधकोशीको बस्ती पहिरोको जोखिममा

२६ असार, विराटनगर । अबिरल वर्षासँगै आएको पहिरोका कारण सोलुखुम्बुको माप्य दूधकोसी गाउँपालिकाको एउटा बस्ती जोखिममा परेको छ । बिहीबार बस्ती नजिकै गएको पहिरोका कारण माप्य दूधकोसी गाउँपालिका-४ काँकुका २५ घर उच्च जोखिममा परेका हुन् ।

१ नम्बर प्रदेश प्रहरी कार्यालय विराटनगरका अनुसार पहिरोका कारण माटो र ढुंगाले बनेका २५ वटा घर जोखिममा छन् । माटो र ढुंगा प्रयोग गरी बनाइएका दुई तले केही घर पहिरोका कारण चर्किएका छन । वर्षा निरन्तर रहेकाले बस्ती उच्च जोखिममा रहेको प्रहरीले बताएको छ ।

गाउँपालिका प्रमुख प्रशासकीय अधिकृत जोनाथन राईका अनुसार बस्ती नजिकै पहिरोले सदरमुकाम सल्लेरी जोड्ने रोडमुनि रहेका घरहरु बढी जोखिममा छन् । पहिरो प्रभावित क्षेत्रको प्राविधिक पक्षको अध्ययनका लागि बिहीबार नै प्राविधिक खटाएको उनले बताए ।

‘पहिरो गएपछि टोली पठाएर अध्ययन गर्न लगाएका छौं,’ राईले भने, ‘अध्ययन गरेर टोली कार्यालय र्फकँदैछ ।’ उनका अनुसार पहिरो गएको स्थान काँकुको सानो बस्ती रहेको स्थान घेनाफु हो ।

उदयपुरमा १ जना घाइते

अबिरल वर्षासँगै आएको पहिरोका कारण उदयपुरको कटारी नगरपालिका- ११ बेतनीमा एकजना सामान्य घाइते भएका छन् ।

सडक माथिबाट आएको पहिरोमा मोटरसाइकल फसे पनि निकाल्न गएका स्थानीय दीपक मगर सामान्य घाइते भएको प्रदेश प्रहरी कार्यालय विराटनगरले जनाएको छ । घाइतेको कटारी अस्पतालमा उपचार भइरहेको छ ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment