२०७७ साउन २१ गते १७:५४ 
२१ साउन, काठमाडौं। नेपाली राष्ट्रिय नेत्रहीन क्रिकेट टिमका कप्तान भगवती भट्टराई बरालसहित तीनजना ‘ज्योति केसी नेत्रहीन महिला क्रिकेट प्रतिभा पुरस्कार’ बाट सम्मानित भएका छन् ।
नेपाल नेत्रहीन क्रिकेट संघले १५औं वार्षिकोत्सवको अवसरमा बुधबार तीन खेलाडीलाई प्रतिभा पुरस्कारबाट सम्मान गरेको हो । संघले हरेक वर्षको साउन २२ गते वार्षिकोत्सव मनाउने गर्छ ।
सम्मानित हुने खेलाडीमा बी-३ क्याटेगोरीतर्फ राष्ट्रिय टोलीका कप्तानसमेत रहेकी भगवती भट्टराई, बी-२ बाट मनकेशी चौधरी र बी-१ बाट आशा रेगामी रहेकी छिन् ।
उनीहरुलाई जनही ५/५ हजार र कदरपत्रबाट सम्मान गरिएको संघले जनाएको छ ।
कप्तान भगवती विगत १४ वर्षबाट नेत्रहीन क्रिकेटमा संग्लग रहेकी छिन् । सन् २०१४ मा बेलायत र २०१९ मा पाकिस्तानसँगको सिरिजमा कप्तानी गर्दै नेपाललाई जित दिलाएकी थिइन्।
मनकेशी उत्कृष्ट ब्याटिङका लागि चर्चित छिन् । उनी बेलायत र पाकिस्तानविरुद्धको सिरिजमा प्लेयर अफ दि सिरिज बनेकी थिइन् ।
आशा पनि १४ वर्षबाट नेत्रहीन क्रिकेटमा रहेकी छिन् । सन् २०१९ मा पाकिस्तानविरुद्धको सिरिजमा उनले उत्कृष्ट प्रदर्शन गरेकी थिइन् ।
प्रतिक्रिया 4