२५ माघ, काठमाडौं । डिफेण्डर राफेल भरानले दुई गोल गरेपछि रियल मड्रिडले स्पानिस ला लिगामा हुएस्कामाथि पुनरागमन जित हात पारेको छ ।
भरानले दोस्रो हाफमा दुई गोल गरेपछि रियलले हुएस्कालाई २-१ ले पराजित गरेको हो ।
पहिलो हाफमा गोलरहित बराबरीमा सकिएको खेलको ४८औं मिनेटमा जाभी गालानले गोल गर्दै घरेलु टोली हुएस्कालाई अग्रता दिलाएका थिए । तर अग्रता धेरै समय रहेन । रियलका लाग भरानले ५५औं मिनेटमा बराबरी गोल फर्काए । ६४औं मिनटमा भरानकै व्यक्तिगत दोस्रो गोलमा रियलले पुनरागमन जित हात पारेको हो ।
जितपछि दोस्रो स्थानमा रहेको रियलको २१ खेलबाट ४३ अंक भएको छ लिग लिडर एट्लेटिको मड्रिडभन्दा अझै ७ अंकले पछि छ । २१ खेल खेलेको एट्लेटिकोको ५० अंक छ ।
यस्तै गेटाफेलाई ३-० ले पराजित गर्दै सेभिया तेस्रो स्थानमा उकलिएको छ । २१ खेलबाट सेभियाको ४२ अंक छ । २० खेलबाट ४० अंक रहेको बार्सिलोना चौथो स्थानमा झरेको छ । बार्सिलोनाले आज राती रियल बेटिससँग खेल्दैछ ।
