भियारियाललाई हराउँदै एट्लेटिकोले बनायो ५ अंकको अग्रता

१७ फागुन, काठमाडौं । स्पानिस ला लिगाको शीर्ष स्थानमा रहेको एट्लेटिको मड्रिडले भियारियाललाई २-० ले पराजित गरेको छ । जितपछि एट्लेटिकोले दोस्रो स्थानको बार्सिलोनामाथि ५ अंकको अग्रता बनाएको छ र एट्लेटिकोले अझै एक खेल कम खेलेको छ ।

भियारियालको मैदानमा भएको खेलमा एट्लेटिकोलका लागि जाओ फेलिक्सले एक गोल गरे । अर्को गोल एट्लेटिकोले उपहार पाएको थियो ।

२७औं मिनेटमा भियारियालका अल्फोन्सो पेड्राजाले आत्मघाती गोल गर्दा एट्लेटिकोले अग्रता बनाएको थियो । फेलिक्सले ६९औं मिनेटमा गोल गर्दै एट्लेटिकोलाई २-० को जित दिलाए ।

जितपछि एट्लेटिकोले २४ खेलबाट ५८ अंक जोडेको छ । २५ खेलबाट बार्सिलोनाको ५३ अंक छ ।

भियारियल २५ खेलबाट ३७ अंकसहित सातौं स्थानमा छ ।