स्वास्थ्यकर्मीमाथि हातपात गर्नेलाई कडा कारवाही गर्न प्रादेशिक अस्पतालको माग

२९ वैशाख, काठमाडौं । प्रादेशिक अस्पताल जनकपुरधामले मंगलबार साँझ अस्पतालको भेन्टिलेटर कक्षभित्र प्रवेश गरेर होहल्ला गरी स्वास्थ्यकर्मीमाथि हातपात गर्ने व्यक्तिहरुमाथि कडा कारवाहीको माग गरेको छ ।

मंगलबार साँझ ६ बजे प्रादेशिक अस्पतालको कोभिड–१९ विशेष अस्पतालमा डाक्टरसँग सल्लाह नै नगरी सोझै बिरामीलाई भेन्टिलेटरमा राखेर नयाँ बिरामीका कुरुवा र अन्य अज्ञात व्यक्तिले होहल्ला गरी  स्वास्थ्यकर्मी र कर्मचारीमाथि हातपात गरेको अस्पतालको भनाइ छ ।

अस्पतालले बुधबार प्रेस विज्ञप्ति जारी गर्दै विश्वव्यापी महामारीको विषम परिस्थितिमा अहोरात्र बिरामीको सेवामा खटिरहेका कर्मचारीहरुमाथि हातपात हुनु भत्र्सनायोग्य भएको बताएको छ ।

‘यस्तो विश्वव्यापी महामारीको विषम परिस्थितिमा पनि आफ्नो ज्यान जोखिममा राखेर अहोरात्र बिरामीको सेवामा खटिरहेका कर्मचारीहरुलाई हापात गर्ने व्यक्तिमाथि छानविन गरी कायरवाहीको लागि सम्पूर्ण सरोकारवाला निकायहरुलाई अनुरोध छ,’ अस्पतालद्वारा जारी विज्ञप्तिमा भनिएको छ ।

आईसीयूमा तीनवटा नयाँ जडान भएका भेन्टिलेटर मेसिनलगायत अन्य उपकरण तोडफोड भएकाले क्षतिपूर्तिको सोधभर्ना गराउन पनि अस्पतालले माग गरेको छ । यसबाट पर्ने असरको जिम्मेवारी सम्बन्धित निकायहरुले लिनुपर्ने पनि अस्पतालले बताएको छ ।