नारायणी अस्पतालमा अब बिरामी कुरुवाले अक्सिजन सिलिण्डर ल्याउनु नपर्ने

६ साउन, वीरगञ्ज । कोरोना संक्रमणको दोस्रो लहर उत्कर्षमा पुग्दा नारायणी अस्पतालमा संक्रमितको अत्याधिक चाप थियो । नयाँ भेरियन्ट सहितको कोरोना संक्रमितको शरीरमा अक्सिजनको कमी हुने समस्या थियो । संक्रमितलाई हाई फ्लोमा अक्सिजन दिनुपर्ने अवस्था थियो । तर त्यसबेला ‘टर्सरी अस्पताल’ घोषित नारायणीमा अक्सिजन प्लान्ट त परको कुरा, अक्सिजन पाइपलाइन समेत थिएन ।

तर अहिले नारायणी अस्पतालको स्थितिमा सुधार आइसकेको छ । अस्पतालमा तीन ठाउँमा अक्सिजन सप्लाई गर्ने स्टेसन बनाइएको छ । अक्सिजन स्टेसनमा सिलिण्डरमार्फत अक्सिजन सप्लाई हुँदै आएको छ ।

अस्पतालमा उपचाररत कोरोना संक्रमित मात्रै नभएर श्वासप्रश्वासका अन्य बिरामीका लागि पनि अक्सिजन पाइपलाइनबाट अक्सिजन दिन सकिन्छ । इमरजेन्सी, आईसीयू, एचडीयू र सर्जिकल वार्डमा अक्सिजन पाइपलाइन जडान भइसकेको छ । उद्योग वाणिज्य संघ वीरगञ्जको सहयोगमा तयार पारिएको ३० बेडको बाल सघन चिकित्सा कक्ष पनि अक्सिजन पाइपलाइन सहितको छ ।

यो पनि पढ्नुहोस

बिरामी कुरुवा आफैं जोहो गर्छन् जगेडा अक्सिजन सिलिन्डर

इमरजेन्सीमा सूर्य नेपालले अक्सिजन पाइपलाइन जडानमा सहयोग गरेको थियो भने नेपाल फर्मास्युटिकल्स, सत्यनारायण क्याल लगायतले पनि विभिन्न वार्डमा अक्सिजन पाइपलाइन विस्तारमा सहयोग गरेका छन् । अस्पतालले २५ लाख रुपैयाँ खर्च गरेर एचडीयू वार्डमा अक्सिजन पाइपलाइन जडान गरेको अस्पतालको जिन्सी शाखा प्रमुख सुशील यादवले बताए ।

अक्सिजन पाइपलाइन जडान भएपछि कोराना संक्रमित सहित अक्सिजन चाहिने बिरामीको उपचारमा सहज भएको अस्पतालमा कार्यरत स्वास्थ्यकर्मीहरु बताउँछन् । नर्स अहेमा थापा अब अस्पतालमा संक्रमितका लागि अक्सिजन सिलिण्डर ओसार्नुपर्ने झन्झटबाट मुक्ति मिलेको बताउँछिन् । ‘अब कसैले पनि अक्सिजन सिलिण्डर ओसार्नुपर्दैन,’ उनले भनिन्, ‘बिरामीको अक्सिजन सकिएपछि समयमै अर्को जडान गर्न नसकिने हो कि ? भन्ने चिन्ता पनि छैन ।’

नारायणी अस्पतालका डाक्टर सरोजरोशन दास अक्सिजन पाइपलाइन जडान भएपछि काम गर्न निकै सहज भएको बताउँछन् । ‘सिलिण्डरबाट अक्सिजन दिंदा सकिने बित्तिकै संक्रमित हाईपोक्सियामा जान्थे । फेरि नर्मल अवस्थामा ल्याउन समय लाग्थ्यो । रातको समयमा कम जनशक्ति हुने हुँदा झनै गाह्रो हुन्थ्यो,’ उनले भने, ‘थप जनशक्ति राख्नुपर्दा बढी खर्च भइरहेको थियो । अब जनशक्ति कम भए पुग्छ ।’

तीनवटा अक्सिजन प्लान्ट जडान हुँदै

नारायणी अस्पतालमा तीनवटा अक्सिजन प्लान्ट जडानको तयारी भइरहेको अस्पतालका निमित्त मेडिकल सुपरिटेन्डेन्ट डा. वीरेन्द्र प्रधान बताउँछन् । उनका अनुसार एउटा नारायणी अस्पतालले २ करोड ४० लाखमा खरिद गरेको अक्सिजन प्लान्ट छ । जसको १ सय वटा सिलिण्डर भर्न सक्ने क्षमता छ ।

अर्को स्वास्थ्य सेवा विभागले २० टनको लिक्विड अक्सिजन प्लान्ट पठाएको छ । प्लान्ट राख्ने ठाउँको व्यवस्थापन भइरहेको छ । उक्त प्लान्टको १५ सय लिक्विड अक्सिजन सिलिण्डर भर्न सक्ने क्षमता यसको छ ।

यस्तै पर्सा क्षेत्र नम्बर २ का सांसद एवं पूर्वमन्त्री विमल श्रीवास्तवको संसदीय कोष अन्र्तगतको स्थानीय पूर्वाधार विकास साझेदारी कार्यक्रमबाट महानगरपालिकाले खरिद गरेको अक्सिजन प्लान्ट पनि आइसकेको छ । वीरगञ्ज महानगरपालिकाले १ करोड ४७ लाख ९२ हजार रुपैयाँमा वयोधा मेडिकल टेक्नोलोजी प्रालि ललितपुर मार्फत प्लान्ट खरिद गरेको थियो ।

‘प्लान्टबाट अक्सिजन उत्पादनको परीक्षण समेत गरिसकेका छौं, एक घण्टामा ३३ किलोवाट बिजुली खपत हुन्छ । थ्रिफेज लाइन जडान भइसकेको छ,’ महानगरका इन्जिनियार राकेश साहले भने, ‘अस्पतालको प्लान्टलाई पनि सँगै जोड्ने योजना छ । पाइपलाइनमा कनेक्सको काम बाँकी छ ।’

अक्सिजन सिलिण्डर फिर्ता गर्ने तयारी

नारायणी अस्पतालमा हाल ६ सय थान अक्सिजन सिलिण्डर छ । २५० थान अस्पतालको आफ्नो सिलिण्डर हो भने ३७५ थान धरौटीमा ल्याइएको थियो । संक्रमितको संख्या घट्नुका साथै अक्सिजन सप्लाई पाइपबाट हुन थालेपछि सिलिण्डर प्रयोगविहीन छन् । धरौटी राखेर ल्याइएको सिलिण्डर फिर्ता गर्ने तयारी भइरहेको छ ।

अस्पतालमा नर्मल अवस्थामा तीन सय वटा सिलिण्डरजति आवश्यक पर्ने भएकोले थप २५ वटा खरिद गर्ने वा कुनै दाताले दिए लिने सोच अस्पतालको छ ।