अस्ट्रेलियन ओपनमा खेलाडीले कोभिड परीक्षण गर्नु नपर्ने

२५ पुस, काठमाडाैं । वर्षको पहिलो ग्राण्डस्लाम टेनिस अस्ट्रेलियन ओपनको आसन्न संस्करणमा सहभागी खेलाडीले कोभिड परीक्षण गर्नु नपर्ने भएको छ । खेलाडीहरु संक्रमित रहेछन् भने पनि उनीहरूले चाहँदासम्म खेल्न पाउनेछन् ।

‘हामी केवल त्यही अनुसरण गर्दैछौं, जुन अहिले समुदायमा भइरहेको छ,’ प्रतियोगिताका निर्देशक क्रायग टिले भन्छन्, ‘हामी एक कदम अगाडि बढेका छौं र यदी तपाई विरामी हुनुहुन्छ भने टाढै रहनुस् मात्र भन्न सक्छौं ।’

प्रतियोगिताको पछिल्लो संस्करणमा खेलाडीले हरेक दिन कोभिड परीक्षण गर्नुपर्ने थियो । संक्रमित भएमा आइसोलेट हुनुपर्ने र कोभिड खोप पनि लगाउनु अनिवार्य थियो । त्यसअघि सन् २०२१ को संस्करण त बायो सेक्योर बबलमा खेलाइएको थियो ।

अस्ट्रेलियन ओपनको उपाधि सर्बाधिक ९ पटक जितेका नोभाक जोकोभिचलाई गत संस्करण कोभिड परीक्षण गर्न र खोप लगाउन नमानेपछि प्रतियोगिताअघि देशनिकाला गरिएको थियो ।

‘हामीले खेलाडीलाई मात्र होइन कर्मचारीहरुलाई पनि यदी अस्वस्थ महशुस गर्नुभएको छ भने घरमै बस्नुस भनेका छौं । हाम्रा मेडिकल कर्मचारीहरु खेलाडीका साथसाथै उनीहरुको पनि निगरानी गर्नेछन्,’ टिलेले भने ।