आर्मीमाथि एनआरटीको जित

१० जेठ, काठमाडौं । शहीद स्मारक ए डिभिजन लिग फुटबल अन्तर्गत बुधवार भएको खेलमा न्युरोड टिम एनआरटी विजयी भएको छ ।

दशरथ रंगशालामा भएको खेलमा आर्मीले एनआरटीलाई १–० को नतिजा सुम्पियो । एनआरटीलाई स्पष्ट जित दिलाउनका लागि कृतिश रत्न छुन्जूले ७९ औं मिनेटमा गरेको गोल निर्णायक बनेको हो । कृतिशले सञ्जीव विष्टले उपलब्ध गराएको बललाई नियन्त्रणमा लिँदै उत्कृष्ट गोल गरेका हुन् ।

लिगमा आर्मीविरुद्ध एनआरटी अपराजित रह्यो । यी दुईबीचको पहिलो भेट ३–३ को बराबरीमा सकिएको थियो ।

जितसँगै २१ खेलमा २१ खेलमा २६ अंक जोडेको एनआरटी आठौं स्थानमा उक्लिएको छ । पराजय व्यहोरेको आर्मी समान खेलबाट २९ अंकका साथ पाँचौं स्थानमा यथावत छ ।