संसदमा प्रचण्ड : रविलाई धन्यवाद, ओली र लिङ्देनलाई प्रश्न

२५ असार, काठमाडौं । प्रधानमन्त्री पुष्पकमल दाहाल प्रचण्डले आफ्नो विवादास्पद अभिव्यक्तिबारे स्पष्टीकरण दिने क्रममा कमजोरी मात्र स्वीकार गरेनन्, विपक्षी दलहरु बीचमा दुरी देखाउने प्रयाससमेत गरेका छन् ।

एक पुस्तक विमोचन कार्यक्रममा प्रचण्डले आफूलाई प्रधानमन्त्री बनाउन प्रितम सिंह पटकपटक भारत गएको अभिव्यक्ति दिएपछि विपक्षी दलहरुले आपत्ति जनाएका थिए ।

२० असारको संसद बैठक सुरु हुनासाथ नेकपा एमाले, राष्ट्रिय स्वतन्त्र पार्टी र राप्रपाका सांसदहरु आ आफ्नो स्थानमा उठेका थिए । सभामुखले समय दिएपछि एमाले सांसद रघुजी पन्तले प्रधानमन्त्रीले राजीनामा दिनुपर्ने माग गरे । लगत्तै सत्तारुढ सांसदलाई बोल्न समय दिएपछि राप्रपाहरु रोष्ट्रम घेराउ गर्न पुगे र सभामुखले बैठक स्थगित गरे । त्यसयता संसद अवरुद्ध भइरह्यो ।

प्रमुख तीन दलका शीर्ष नेताहरुबीच भएको छलफलमा प्रधानमन्त्री आफ्नो कमजोरी स्वीकार गर्न तयार भएपछि एमाले संसदको अवरोध हटाउन तयार भयो ।

सोमबारको बैठक सुरु हुनासाथ एमाले सांसद गोकुल बास्कोटाले प्रधानमन्त्रीको अभिव्यक्तिमा आपत्ति जनाए । लगत्तै रास्वपा सभापति रवि लामिछानेले बोले । उनले प्रधानमन्त्रीको अभिव्यक्तिमा आपत्ति मात्र जनाएनन्, यो मुद्दामा आफ्नो दल एमालेभन्दा फरक स्थानमा रहेको समेत बताए ।

अघिल्लो बैठकमा आफूहरुलाई बोल्न नदिएको र ‘प्रमुख प्रतिपक्षले जे बोल्यो, त्यसलाई हाम्रै भाष्य हो भन्ने किसिमको जालसाजीपूर्ण क्रियाकलाप भएकोमा आपत्ति जनाउँदै उनले भने, ‘रास्वपा प्रतिपक्ष भूमिकामा छ, तर प्रतिपक्षमा हुनुका आफ्ना मुद्दाहरु छन् । रास्वपा अरु कुनै दलको मुद्दामा होइन, आफ्नै मुद्दामा उभिएको छ । आफ्नै अस्तित्वका साथमा उभिएको छ ।’

प्रधानमन्त्रीको अभिव्यक्तिमा आपत्ति जनाएका उनले भ्रष्टाचारविरुद्ध राम्रो काम थालेको भन्दै ‘स्याबास’ भने । साथै हाँगाबिँगा काटेर भएन, जरासम्म पुग्न सुझाए । राप्रपा अध्यक्ष राजेन्द्र लिङ्देनले भने नैतिकताका आधारमा राजीनामा दिन  प्रधानमन्त्रीलाई आग्रह गरे ।

विपक्षी दलका नेताहरुले बोलेपछि स्पष्टीकरण दिन रोष्ट्रममा पुगेका प्रधानमन्त्री प्रचण्डले विवादास्पद अभिव्यक्तिमा आफ्नो कमजोरी स्वीकार गरे । प्रितम सिंहसँगको सम्बन्ध दिवंगत छोरी ज्ञानुको उपचारको बेलासँग जोडिएको भन्दै उनले भने, थोरै भावनामा आएँ, मैले त्यो नभनेको भए हुन्थ्यो । मनमा आयो, मैले भने ।’ त्यो दिन प्रधानमन्त्रीका रुपमा नभई ज्ञानुको बुबा भएर बोल्न पुगेको भन्दै कमजोरी स्वीकारे ।

साथै प्रतिपक्षी दलहरु एउटै ठाउँमा छैनौं भन्ने रविको सन्देशलाई प्रचण्डले टपक्क टिपे । प्रधानमन्त्री प्रचण्डले अगाडि भने, ‘प्रतिपक्ष पनि एउटै छैनौं भन्ने आज औपचारिक अर्थमा प्रस्तुत भयो । यसका लागि धन्यवाद भन्न चाहन्छु ।’

सुशासन र जनअपेक्षाको प्रश्नमा सरकारले कदम चालिरहेको र चाल्ने उनले बताए । सरकारलाई स्याबास भन्ने रविको अभिव्यक्तितर्फ संकेत गर्दै उनले भने, प्रतिपक्षका साथीहरुले धन्यवाद भन्नुभयो । म पनि काउन्टर धन्यवाद भन्न चाहन्छु ।’

अनि राजीनामा माग गर्ने एमाले र राप्रपातिर संकेत गर्दै संसदको विश्वसनीयतामाथि प्रश्न उठाउनु र स्पष्टीकरणको मौका नदिई राजीनामा माग्नु उचित हो भनेर प्रश्न गरे ।

आफूलाई प्रधानमन्त्री बनाउन हस्ताक्षर गरेका नेताहरुले नै कसले बनायो प्रधानमन्त्री भन्ने प्रश्न गरेको भन्दै उनले अगाडि भने, मलाई प्रश्न गर्दा प्रश्न उठाउने दल वा माननीय पनि प्रश्नको घेरामा हुनुहुन्छ ।’