खै के बेचेकी थिएँ ? (गजल)

के सम्झुँ खै आँफ्ना चिज, कुन-कुन बेचेकी थिएँ ?

बाबु, तिम्लाई हुर्काउन मैले मेरो खुन बेचेकी थिएँ

आज गरगहनामाथि सुत्छु आमा भनेर फोन गरेउ

तिम्रो यही खुसी देख्न, कानको सुन बेचेकी थिएँ

‘भरिपूर्ण छु म आमा’ भनेको सुन्दा खुसी लाग्छ

पेटभरी तिम्लाई खुवाएर बाँकी तिहुन बेचेकी थिएँ

जहाँजता म गए पनि एक्लै घरमा कहिल्यै छोडिनँ

कोखिलामा तिम्लाई च्यापेर मैले नुन बेचेकी थिएँ

छोरा ! त्यसैले त दुनियाँले तिम्लाई पुकार्छन् आज

बजारभरी मेरा सबै बैगुन र तिम्रा गुन बेचेकी थिएँ