बागमतीमाथि गण्डकीको रोमाञ्चक जित

९ माघ, काठमाडौं । युवा ब्याटर करन पंगेनी र स्पिनर कमल परियारको उत्कृष्ट प्रदर्शनमा गण्डकी प्रदेशले प्रधानमन्त्री कप एकदिवसीय राष्ट्रिय प्रतियोगितामा बागमती प्रदेशमाथि ३ विकेटको रोमाञ्चक जित हात पारेको छ ।

गण्डकीसँगको हारले बागमतीको शीर्ष दुईमा रहँदै फाइनल खेल्ने सम्भावनामा ठूलो धक्का लागेको छ ।

जितको लागि पाएको १९९ रनको मध्यम विजयी लक्ष्य गण्डकीले ४९.३ ओभरमा ७ विकेट गुमाउँदै पूरा गर्‍यो ।

गण्डकीका करन पँगेनीले ९८ बलमा ६ चौका र ३ छक्कासहित सर्वाधिक ७९ रनको एक उत्कृष्ट इनिङ खेले ।

गण्डकीलाई ७ बलमा ४ रन चाहिँदा प्रतिश जि.सीको बलमा ठूलो सट खेल्ने धुनमा करण टप एज लागेर फस्ट स्लिपमा अशोक पौडेलबाट क्याच आउट भए ।

अन्तिम ६ बलमा जितको लागि ४ रन चाहिएको थियो । बागमतीले रिजन ढकाललाई छाडेर सबैलाई आश्चर्य पार्दै ईशान पाण्डेलाई बलिङ दिएको थियो । ईशान पाण्डेले पहिलो बलमा कृष ऐरलाई एक रन दिए ।

दोस्रो बलमा अन्कित न्यौपानेको क्याच लङअनमा अशोक पौडेलले छाडेपछि बाँकी चार बलमा एक रन मात्रै चाहिएको थियो ।

तेस्रो बलमा एज लागेर थर्डम्यानमा चौका हान्दै अंकितले रोमाञ्चक जित दिलाए ।

गण्डकीलाई ओपनर समिर कँडेल र ईश्वर क्षेत्रीले ५५ रनको साझेदारी गर्दै राम्रो सुरुवात दिलाएका थिए । समिर ४१ बलमा १ चौकासहित १९ रन बनाउँदै आउट भए । ईश्वर ४२ बलमा ५ चौका र १ छक्कासहित ३६ रन जोडे ।

तेस्रो विकेटका लागि मुश्कान थापा र करनले ७० रनको साझेदारी गर्दै गण्डकीलाई जितको आधार तय गरेका थिए ।

मुश्कान थापा ७१ बलमा २ चौकासहित २७ र कमल परियार २० रनमा आउट भए । बागमतीका प्रतिश जि.सीले दुई, रिजन ढकाल, सूर्य तमाङ र विपिन आचार्यले १–१ विकेट लिए ।

त्यसअघि त्रिवि क्रिकेट मैदानमा टस जितेर पहिला ब्याटिङ रोजेको बागमती ४९.१ ओभरमा १९८ रनमा अल आउट भएको थियो । ओपनर आशुतोष घिरैयाले ६९ बलमा ५ चौकासहित सर्वाधिक ४४ रन बनाए । ईशान पाण्डेले ६२ बलमा २ चौका र २ छक्कासहित ४३ रन बनाए । बागमतीका अन्य कुनै पनि ब्याटरले राम्रो प्रदर्शन गर्न सकेनन् ।

बागमतीलाई ओपनर आशुतोष घिरैया र ईशान पाण्डेले २०.२ ओभरमा ९० रनको साझेदारी गर्दै उत्कृष्ट सुरुवात दिलाएका थिए ।

त्यसपछिका ब्याटर चल्न नसक्दा बलियो योगफलको आधार बनाउनबाट चुकेको थियो । कप्तान रित गौतम १३, रविन जोशी डक, अशोक पौडेल ३०, विपिन आचार्य ३८, प्रतिश जि.सी २ र सूर्य तामाङले १५ रन बनाए ।

गण्डकीका कमल परियारले १० ओभरमा १ मेडनसहित ३१ रन खर्चेर ४ विकेट लिएका थिए । विपिन खत्रीले १० ओभरमा २ मेडनसहित २७ रन खर्चेर २ विकेट लिए । अमृत गुरुङ २ र सन्दीप पराजुलीले १ विकेट लिए ।

बागमती ७ खेलमा ४ मा जित र ३ मा हारसहित ८ अंकका साथ दोस्रो स्थानमा छ । गण्डकी ५ खेलमा २ मा जित र ३ मा हारसहित ४ अंकका साथ आठौं स्थानमा छ ।

पुलिस ४ खेलमा ८ अंकका साथ शीर्षस्थानमा छ । मधेश ६ खेलमा ८ अंक्का साथ तेस्रो स्थानमा छ । आर्मी ६ खेलमा ८ अंकका साथ चौथो स्थानमा छ । शीर्ष दुई टोली फाइनल खेल्नेछन् ।