वाफ वुमन्स च्याम्पियनसिप उपविजेता टोलीका खेलाडीलाई जनही ५१ हजार दिने एन्फाको घोषणा

१९ फागुन, काठमाडौं । साउदी अरेबियामा भएको वाफ वुमन्स च्याम्पियनसिपमा उपविजेता बनेको नेपाली राष्ट्रिय महिला फुटबल टोलीका खेलाडीलाई अखिल नेपाल फुटबल संघ एन्फाले जनही ५१ हजार रुपैयाँ दिने भएको छ ।

शुक्रबार राती स्वदेश फर्किएको नेपाली टोलीलाई त्रिभुवन अन्तर्राष्ट्रिय विमानस्थलमा स्वागत गर्दै एन्फा अध्यक्ष पंकज विक्रम नेम्वाङले टोलीका खेलाडीहरुलाई ५१-५१ हजार प्रदान गर्ने घोषणा गरेका हुन् ।

पहिलो पटक वाफ वुमन्स च्याम्पियनसिप खेलेको नेपाली टोली फाइनलमा जोर्डनसँग पेनाल्टीसुटआउटमा ५-३ ले पराजित हुँदै उपविजेता बनेको थियो । प्रतिस्पर्धात्मक खेलको निर्धारित २-२ को बराबरीमा सकिएको थियो । तर पेनाल्टीसुटआउटमा नेपाल अभागी बन्यो ।

आठ पटक प्रतियोगिता खेल्दा जोर्डनले भने छैटौं पटक उपाधि जित्यो ।

नेपाली महिला टोली अन्तर्राष्ट्रिय प्रतियोगिताको फाइनलमा पराजित भएको यो ११औं पटक हो । प्रतियोगितामा नेपाली फरवार्ड सावित्रा भण्डारीले चार खेल खेल्दै सर्वाधिक ९ गोल गरिन् । फ्रेन्च क्लबमा अनुबन्ध हुादै इतिहास रचेकी उनी जोर्डन विरुद्धको फाइनल खेलमा भने अनुपस्थित भइन् । क्लब ड्युटीका कारण उनी फाइनल छाडेर फ्रान्स फर्किएकी थिइन् ।