सौगात र अनुपविक्रम अभिनित फिल्म ‘जार’को टिजर सार्वजनिक

काठमाडौं । साहित्यकार इन्द्रबहादुर राईको कथामा आधारित फिल्म ‘जार’को टिजर सार्वजनिक भएको छ । तिहारको सन्दर्भमा निर्माताले सार्वजनिक गरेको टिजर सरल तर रोचक लाग्छ ।

फिल्मको शीर्ष भूमिकामा गीताञ्जली थापा, अनुपविक्रम शाही र सौगात मल्ल छन् । गीताञ्जलीले फिल्म ‘लायर्स डाइस’बाट उत्कृष्ट अभिनेत्री विधामा भारतको राष्ट्रिय चलचित्र अवार्ड जितेकी छन् ।

उनका फिल्म टोरन्टो, बुसान, लस एन्जलस, न्युयोर्क फिल्म फेस्टिभलमा समेत स्क्रिनिङ भइसकेका छन् । व्यावसायिक मोडलिङपछि सन् २०१० मा उनले भारतीय फिल्म ‘टीना की चाबी’बाट अभिनयमा डेब्यु गरेकी थिइन् । नेटफ्लिक्स सिरिज ‘सेक्रेड गेम्स’को सिजन १ मा उनले नायानिका सेहेगलको भूमिका निर्वाह गरेकी थिइन् ।

सिक्किममा छायांकन गरिएको फिल्म ‘जार’को कथा बुझ्न कठिन छैन । यो सम्बन्धको कथा हो । निर्माताले फिल्मको प्रदर्शन मिति चाँडै घोषणा हुने जनाएका छन् । फूर्वा छिरिङ लामाले यो फिल्मलाई निर्देशन गरेका हुन् ।

फेरी टेल पिक्चर्सको ब्यानरमा फिल्म निर्माण भएको हो । यो फिल्मको सबै छायांकन सिक्किममा गरिएको । अधिकांश कलाकार र प्राविधिक पनि सिक्किमका छन् ।