बाहिरिसकेको लुम्बिनीविरुद्ध खेल्दा कर्णालीको नजर प्लेअफमा

२८ मंसिर, काठमाडौं । नेपाल प्रिमियर लिग (एनपीएल) बाट बाहिरिसकेको पहिलो टिम लुम्बिनी लायन्स विरुद्ध कर्णाली याक्सले आज खेल्दैछ । खेल कीर्तिपुरस्थित टीयू अन्तर्राष्ट्रिय क्रिकेट मैदानमा बिहान ९ बजे सुरु हुनेछ ।

यसअघि ६ खेल खेलमा पारजित भएर प्लेअफ होडबाट बाहिरसकेको लुम्बिनी लिगकै अन्तिम खेल खेल्दैछ । अब लुम्बिनीलाई गुमाउनु केही छैन । अर्कोतर्फ कर्णाली याक्स लुम्बिनीलाई हराएर प्लेअफ यात्रा अझ बलियो बनाउने लक्ष्यमा छ । ५ खेल खेल्दा ३ मा जित र २ मा हारबाट ६ अंक जोडेको कर्णाली पाँचौ स्थानमा छ ।

अहिलेसम्म जनकपुर बोल्ट्स प्लेअफमा छनोट भइसकेको छ । अब बाँकी ३ स्थानका लागि ६ टिम नै होडमा छन् । ६ टिममध्ये पनि सुदूरपश्चिम रोएल्स, चितवन राइनोज र कर्णाली प्लेअफमा बलियो दाबेदारको रुपमा छन् । लुम्बिनी भने बाहिरिसकेको छ । ५ खेल खेल्दा ४ खेलमा पराजित विराटनगरको पनि शीर्ष चारमा रहेर प्लेअफ पुग्ने सम्भावना लभग सकिएको जस्तै छ ।

सुरुवाती दुई खेलमा पराजित भएपनि त्यसपछि लगातार तीन खेल जितेको कर्णाली लयमा छ र त्यो जितको लय कायम राख्न चाहन्छ । लुम्बिनीलाई पराजित गरेमा कर्णाली प्लेअफको एक कदम नजिक पुग्नेछ ।

सोमपाल कामीको कप्तानीमा रहेको कर्णालीका लागि पछिल्लो दुई खेलमा अष्ट्रेलियन खेलाडी विलियम बोसिस्टोले राम्रो प्रदर्शन गरिरहेका छन् । यस्तै युवा स्पीनर विपिन प्रसाद शर्माले पनि लगातार राम्रो खेलिरहेका छन् । उनी ट्यालेन्ट हन्टबाट छनोट भएका मध्ये एनपीएल खेल्ने पहिलो र एक्लो खेलाडी हुन् ।

यस्तै ओमानका जिसान मकसुदले ब्याट र बलमा कन्ट्रिबुट गरिरहेका छन् । गुल्सन झा ले अपेक्षा अनुसार खेल देखाउन नसकेपनि पछिल्लो खेलमा पोखरा एभेन्जर्स विरुद्ध अविजित ४९ रनको इनिङ्स खेलेका थिए ।उक्त खेलमा बोसिस्टोले एक्लै ६ विकेट लिएका थिए ।

कर्णालीका आशा गरिएका हङकङका ब्याटर बाबर हायतको ब्याट चलेको छैन । उनको ब्याट चलेको दिन उनी एक्लै पनि खेल जिताउन सक्ने खेलाडी हुन् ।

यता राष्ट्रिय टिमका कप्तान रोहित पौडेलको कप्तानीमा रहेको लुम्बिनीले सुरुवाती चार खेलमा हार व्यहोरेको थियो । पाँचौ खेलमा आएर पहिलो जित हात पारेको लुम्बिनीले प्लेअफ पुग्ने आशा राखेको थियो । तर त्यसपछि छैटौं खेलमा काठमान्डु गुर्खाजसँग पराजित भएपछि औपचारिक रुपमा लुम्बिनी प्लेअफ होडबाट बाहिरियो । अब अन्तिम खेलमा लुम्बिनीका लागि प्रतिष्ठाको विषय मात्र हुनेछ । त्यसैले कप्तान रोहितले अन्तिम खेलमा अहिलेसम्म नखेलेका खेलाडीलाई पनि अवसर दिने बताएका छन् ।

प्लेअफ होडबाट बाहिरिसकेको लुम्बिनी र प्लेअफ पुग्ने होडमा रहेका कर्णालीबीचको खेल दुई फरक अवस्थाको टिमबीचको खेल हुनेछ ।

खेल : कर्णाली याक्स भर्सेस लुम्बिनी लायन्स

मिति र समय : २८ मंसिर बिहान ९ बजे

स्थान : टीयू अन्तर्राष्ट्रिय मैदान, कीर्तिपुर

कर्णाली याक्स सम्भावित ११ : देव खनाल, बाबर हायत, चाडविक वाल्टन, विलियम बोसिस्टो, जिसान मक्सुद, अर्जुन घर्ती, गुल्सन झा, सोमपाल कामी, नन्दन यादव, विपिन प्रसाद शर्मा, युनिस सिंह ठकुरी

लुम्बिनी याक्स सम्भावित ११ : अर्जुन साउद, उन्मुक्त चन्द, रोहित पौडेल, टम मुर्स, सन्दिप जोरा, विवेक यादव, विकास आग्री, अभिशेष गौतम, तिलक भण्डारी, रामोन सिमोण्ड्स, आरिफ खान