एआई र डेटा सेन्टरमा १०९ खर्ब लगानी गर्दै माइक्रोसफ्ट

आर्टिफिसियल इन्टेलिजेन्स मोडल विकास गर्न तथा एआई तथा क्लाउडमा आधारित अनुसन्धान डाटा सेन्टर निर्माणमा यसवर्ष करिब ८० अर्ब डलर अर्थात् करिब १०९ खर्ब रुपैयाँ लगानी गर्ने माइक्रोसफ्टले घोषणा गरेको छ । शुक्रबार एक ब्लग पोस्टमार्फत् माइक्रोसफ्टले यस्तो जानकारी गराएको हो ।

एआईमा बढ्दो लगानी

सन् २०२२ मा ओपन एआईले च्याट जिपिटी लञ्च गरेपश्चात् आर्टिफिसियल इन्टेलिजेन्सको क्षेत्रमा लगानीमा व्यापक वृद्धि भएको छ । विभिन्न क्षेत्रका कम्पनीहरुले आफ्ना उत्पादन तथा सेवाहरुमा एआईलाई एकीकृत गर्ने प्रयास गरिरहेका छन् ।

एआईको लागि अत्यधिक कम्प्युटिङ क्षमताको आवश्यकता पर्दछ । जसले गर्दा त्यस्ता विशेष डेटा सेन्टरहरुको माग बढिरहेको छ जुन हजारौं चिपहरूलाई एकसाथ जोडेर क्लस्टर बनाउनमा सक्षम हुन्छ । माइक्रोसफ्टले आफ्नो एआई संरचनालाई मजबुत बनाउन तथा आफ्नो डेटा सेन्टर सञ्जाललाई व्यापक बनाउनका लागि पहिलेदेखि नै अर्बौं डलर लगानी गरिसकेको छ ।

वित्तीय अनुमान तथा खर्च

भिजिबल अल्फाका अनुसार माइक्रोसफ्टको वित्तीय वर्ष सन् २०२५ को पुँजीगत खर्च८४ अर्ब २४ करोड डलर पुग्ने अनुमान छ । वित्तीय वर्षको पहिलो त्रैमासिकमा कम्पनीको पुँजीगत व्ययमा ५.३ प्रतिशतले वृद्धि भएको छ, जुन २० अर्ब डलर रहेको छ । अमेरिकामा वित्तीय वर्ष सन् २०२५ को पहिलो त्रैमासिक गत अक्टोबर १ मा सुरु भएर डिसेम्बर ३१ मा सकिएको छ ।