२०८२ जेठ १२ गते १७:४८ 
News Summary
Generated by OK AI. Editorially reviewed.- सिकन्दर राजाले पाकिस्तान सुपर लिगको फाइनलमा महत्वपूर्ण भूमिका खेलेका थिए।
- खेलको टसभन्दा १० मिनेटअघि मात्र लाहोर ओर्लिएका उनले मैदान पुगेर खेल जिताउन नै भूमिका खेले ।
१२ जेठ, काठमाडौं । पाकिस्तान सुपर लिग (पीएसएल)को इतिहासमा सबैभन्दा नाटकीय क्षणमध्येको एक रह्यो आइतबारको फाइनल । जिम्बाबेका अलराउन्डर सिकन्दर राजाले लाहोर कालान्दर्सलाई उपाधि जिताउन महत्वपूर्ण भूमिका खेले तर उनी फाइनल खेल्नुअघिको प्रसंग भने रोचक छ ।
उनी फाइनल खेलको टस हुनुभन्दा १० मिनेटअघि मात्रै पाकिस्तानको लाहोर ओर्लिएका थिए, त्यो पनि कुनै नजिकको ठाउँबाट होइन, इंग्ल्याण्डबाट यूएई अनि त्यहाँबाट पाकिस्तान ।
एक दिनअघि इंग्ल्याण्डसँगको टेस्टको दोस्रो इनिङमा ६० रन बनाएका राजा खेल सकिएपछि विमानस्थल हानिएका थिए र यूएईको दुबई आएर ब्रेकफास्ट गरे भने अबुधाबी पुगेर लन्च गरे ।
त्यहाँबाट पाकिस्तानको लाहोर प्रस्थान गरेका उनी विमानस्थलबाट सिधै आइतबारको पीएसएल फाइनल खेल्न मैदानतर्फ नै लागे ।
फाइनल खेलमा उनले चारै ओभर बलिङ गरेर पछि ब्याटिङमा पनि विजयी चौका उनैले प्रहार गरेका थिए । अन्तिम ओभरमा १३ रन आवश्यक हुँदा उनले चौथो बलमा छक्का र पाँचौं बलमा चौका प्रहार गरे ।
खेलपछि राजालाई टोलीका अन्य खेलाडीहरूले काँधमा बोकेका थिए । ‘टोलीलाई मेरो आवश्यकता थियो, थकाइलाई बेवास्ता गरेँ र यात्रा गरें। यस्तो टोलीको हिस्सा हुन पाएकोमा म भाग्यमानी छु’ उनले खेलपछि भनेका थिए ।
३९ वर्षीय सिकन्दर जिम्बाबेको राष्ट्रिय टोलीबाट तीनवटै फर्म्याटमा तथा फ्रेन्चाइज लिगहरूमा पनि सक्रिय भएर खेलिरहेका छन् ।
प्रतिक्रिया 4