भिजिट भिसा प्रकरणको परकम्प प्रतिनिधिसभामा

१३ जेठ, काठमाडौं । प्रतिनिधिसभामा मंगलबार १४ महिनाअघिको दृष्य दोहोरियो । प्रतिपक्षी दलहरूले गृहमन्त्रीको राजीनामा र उच्चस्तरीय छानबिन समितिको माग राख्दै सदन अवरुद्ध पारे । सत्तापक्ष गृहमन्त्रीको बचाउमा उभियो ।

१४ महिनाअघि पनि त्यस्तै भएको थियो । अहिलेको सत्तारुढ दल नेपाली कांग्रेस प्रमुख प्रतिपक्षी दल थियो । अहिले विपक्षमा रहेका नेकपा माओवादी केन्द्र र राष्ट्रिय स्वतन्त्र पार्टी सत्तामा । रास्वपा सभापति लामिछाने गृहमन्त्री थिए र सहकारी ठगीमा उनको संलग्नता रहेको भन्दै कांग्रेसले राजीनामा मागेर संसद्का २२ वटा बैठक अवरुद्ध बनाएको थियो ।

गृहमन्त्री लामिछानेलाई नैतिकताको पाठ पढाउँदै कांग्रेसका तत्कालीन प्रमुख सचेतक रमेश लेखकले आरोप लागिसकेपछि जो कोहीले पनि निष्पक्ष अनुसन्धानका लागि राजीनामा दिएर मार्ग प्रशस्त गर्नुपर्ने सुझाव दिएका छन् ।

लेखक अहिले गृहमन्त्री छन् । मंगलबार प्रतिनिधिसभाको बैठकमा १४ महिनाअघि उनले लामिछानेको सवालमा दिएका अभिव्यक्ति दोहोर्‍याउँदै रास्वपा सांसद शिशिर खनालले लेखकको राजीनामा मागे । छानबिन समितिको माग गरे ।

खनालअघि बोलेका नेकपा माओवादी केन्द्रका सांसद वर्षमान पुन अनन्तले पनि राजीनामाकै माग गरे । बैठक सुरुआत हुने बित्तिकै विपक्षी दलहरू माओवादी, रास्वपा, राप्रपा, नेकपा एकीकृत समाजवादी लगायतका सांसदहरू आआफ्ना स्थानबाट उठे । सभामुखले बस्न पटकपटक आग्रह गर्दा पनि बसेनन् । वर्षमान र शिशिरले बोलिसकेपछि सभामुखले सत्तापक्षका प्रमुख सचेतक श्याम घिमिरेलाई बोल्न समय दिएपछि नारावाजीमै उत्रिए । यसरी मंगलबारको बैठक अवरुद्ध हुन पुग्यो ।

तस्कर गिरोहसँग मिलेर करोडौं असुलेर भिजिट भिसा नेपाली युवालाई विदेश पठाउने गरिएका घटना सार्वजनिक भएसँगै लेखक मुछिएका छन् । आफ्नै सचिवालयदेखि अध्यागमनसम्मका कर्मचारीलाई अनुकुल अवस्था सिर्जना गरेर लेखकले मानवतस्करीलाई योगदान गरेको आरोप प्रतिपक्षीहरूले लगाएका छन् ।

लगातार विपक्षीको अवरोधपछि आधा घण्टालाई बैठक स्थगित गरेर सहमति खोज्न सभामुख घिमिरले गरेको करिब पाँच घण्टाको प्रयास सार्थक बन्न सकेन । किनभने, १४ महिनाअघि झैं सत्ता र प्रतिपक्ष आआफ्ना अडानबाट टस–मस भएनन् ।

यो पनि पढ्नुहोस

यी प्रश्न, जसबाट गृहमन्त्री लेखक भाग्न पाउँदैनन्

त्यसोतः त्यसको छनक विपक्षी दलहरूले बैठकको प्रारम्भमै देखाइसकेका थिए । माओवादी सांसद पुनले गृहमन्त्री लेखक भिजिट भिसा प्रकरणमा मुछिएको प्रसंग उठाउँदै राजीनामा नदिए बैठक नियमित प्रक्रियामा अघि बढ्न नसक्ने बताएका थिए । माओवादी केन्द्रले अहिले नै कसैलाई आरोपित गर्न नचाहेको सुनाउँदै उनले अनुसन्धानलाई सघाउन लेखकले राजीनामा दिएर मार्ग प्रशस्त गरिदिन आग्रह गरेका थिए ।

‘उहाँको संलग्नता छ भनेर अहिले हामीले दाबी गरिरहेका छैनौं । नेताप्रति अविश्वास फैलाउन हामीलाई रुची छैन,’ पुनले भने, ‘यति गम्भीर विषय उठिसकेपछि निष्पक्ष छानविनका लागि वातावरण बनाइदिनुहोस् । त्यो अवस्था नबन्ने बेलासम्म प्रतिपक्षको तर्फबाट नियमित प्रक्रिया अघि बढ्न नसक्ने जानकारी गराउन चाहन्छु ।’

सांसद पुनले आफू बोलिसकेपछि पनि उठेरै विरोधलाई निरन्तरता कायम राखे । अन्य विषयमा सांसदहरू बोल्न चाहेको उल्लेख गर्दै सभामुख देवराज घिमिरेले बस्नका लागि आग्रह गरे । सभामुख घिमिरेले भने, ‘बोल्नका लागि प्रतिपक्षका नेतालाई बोल्न दिएको स्मरण गराउन चाहन्छु ।’

विपक्षी सांसदहरूले उभिएर विरोध जारी राखेपछि सभामुख घिमिरेले रास्वपा सांसद शिशिर खनाललाई बोल्न समय दिए । खनालले गृहमन्त्री लेखकलाई ३ चैत २०८० मा संसद्मा उनले राखेकै बोली स्मरण गराए । खनालले रास्वपा सभापति रवि लामिछानेलाई सत्ता पक्षले गरेको व्यवहार, लेखकको तत्कालीन बोली, भिजिट भिसा काण्डमा उनी माथि उठेका प्रश्नहरू विस्तारमा राखे ।

यो पनि पढ्नुहोस

भिजिट भिसाका नाममा मानव तस्करी, शंकामा गृह प्रशासन

सहकारीको रकम अपचलन आरोपमा त्यसबेलाका गृहमन्त्री रवि लामिछाने माथि प्रश्न गर्दै राज्यका निकायले अनुसन्धान गर्दा मन्त्री पदबाट राजीनामा गर्नुपर्ने लेखकले बताएका थिए । तत्कालीन समयमा लेखकले बोलीको स्मरण गराउँदै भने, ‘उहाँले कोरेको त्यही लक्ष्मणरेखा, उहाँले स्थापित गरेको त्यही नैतिक धरातलमाथि गम्भीर प्रश्न खडा भएको छ । आज प्रश्न स्वयं गृहमन्त्रीज्यूमाथि उठेको छ । उहाँले त्यतिबेला प्रतिपादन गर्नुभएको सिद्धान्त आज उहाँलाइ लागू हुन्छ कि हुँदैन ?’

रास्वपाले गृहमन्त्री लेखकको राजीनामालाई बटमलाइन बनाएको छ । मानव तस्करसँग मिलेमतो गरेर ठूलो रकमको चलखेल गर्न राजनीतिक संरक्षणबिना सम्भव नभएको रास्वपाको निक्यौंंल छ । गृहमन्त्री लेखकको राजीनामा रास्वपाको वटमलाईन रहेको रास्वपा नेता खनालले अनलाइनखबरसँग बताए ।

कर्मचारी माथि मात्र होइन, गृहमन्त्रीमाथि पनि अनुसन्धान हुनुपर्ने रास्वपाको अडान छ । रास्वपा सांसद खनाल भन्छन्, ‘संगठित ढंगले गरिएको यो भ्रष्टाचारको निष्पक्ष अनुसन्धान हुनुपर्छ, संगठित अपराध र सम्पति शुद्धिकरण संँग जोडीएर हेर्ने गरी छानबिन गर्न एक उच्चस्तरीय छानबिन आयोग नबनेसम्म संसद् चल्न सक्दैन ।’

विपक्षीहरू गृहमन्त्रीको राजीनामा माग्दै विरोधमा उठिरहेपछि सभामुख घिमिरेले पटक पटक बस्न आग्रह गरे । गृहमन्त्री लेखकले संसदमा जवाफ दिने बताइसकेको हुँदा नियमित कार्यसूचीमा प्रवेश गर्न सहयोग गर्न उनको आग्रह थियो । तर, लेखकको जवाफ विपक्षीले सुन्न चाहेनन् । विपक्षी सभामुखको सक्रियतामा बसेको बैठकमा पनि त्यसरी नै प्रस्तुत भए ।

बैठकमा सहभागी एक नेताका अनुसार सत्ता पक्षले गृहमन्त्रीले जवाफ दिनुपर्ने अडान राखेको थियो । रास्वपाले गृहमन्त्रीको राजीनामालाई शर्त दोहोर्‍याइरह्यो । राप्रपा र एकीकृत समाजवादीले आफ्नो दलबाट पनि बोल्नुपर्ने मत छलफलमा राखे ।

माओवादी केन्द्रका प्रमुख सचेतक हितराज पाण्डेले दुई पक्षको छलफलमा मिल्ने अवस्था नबनेको बताए । ‘हाम्रो धारणा संसद्मा जे भन्यौं, त्यही हो । सत्ता पक्षका साथीहरूले गृृहमन्त्रीको जवाफ सुन्नुपर्छ भनिरहनुभयो,’ पाण्डेले अनलाइनखबरसँग भने ।

यो पनि पढ्नुहोस

गृहकै संरक्षणमा हुन्थ्यो विमानस्थलमा सामूहिक असुली

गृहमन्त्री लेखकले राजीनामा नदिने हो भने सत्ता पक्ष संसदीय छानबिन समितिका लागि तयार हुनुपर्ने माग राखेको राप्रपाका प्रमुख सचतेक ज्ञानेन्द्र शाहीले बताए । त्यसमा सत्ता पक्ष तयार नभएपछि सभामुख र प्रमुख सचेतकहरूको छलफल बिना निष्कर्ष टुंगिएको शाहीले जानकारी गराए । ‘गृहमन्त्रीमाथि छानबिन गर्नुपर्छ भन्ने कुरा हामीले उठायौं । सत्ता पक्षका सांसदहरूले त्यसलाई मान्न तयार हुनुभएन,’ शाहीले अनलाइनखबरसँग भने ।

दुई पक्षको छलफलमा संसद्मा बोल्ने कुरामा पनि विवाद देखिएको शाहीले बताए । विपक्षी दल उठेर विरोध गरिरहँदा सत्ता पक्षलाई बोल्न समय दिइएकोप्रति विपक्षीले सभामुख घिमिरेसँग असन्तुष्टि राखेका थिए । विपक्षी उभिएर विरोध गरिरहँदा सभामुख घिमिरेले कांग्रेसमा प्रमुख सचेतक श्याम घिमिरेलाई बोल्न समय दिएका थिए । विपक्षी दलको बुधबार बिहान बैठक बसेर संसद्मा प्रस्तुत हुने बारे थप छलफल हुने उनले जानकारी गराए ।

विपक्षी दलले सदन चल्नका लागि गृहमन्त्री रमेश लेखकको राजीनामालाई शर्त बनाएपछि तथा सत्ता पक्ष राजीनामाका लागि तयार नभएपछि कार्यसूचीमै प्रवेश नगरी मंगलबारको बैठक बुधबारका लागि सारिएको छ । १४ महिनाअघि यस्तै क्रम २२ दिनसम्म चलेको थियो । यसपटक सत्ता र प्रतिपक्षको मिलनबिन्दू चाँडै भेटिएला वा लम्बिएला यसै भन्न सकिने अवस्था छैन ।

यो पनि पढ्नुहोस

गृहमन्त्री लेखकबारे कांग्रेसभित्रै दुईथरी मत

यो पनि पढ्नुहोस

यी हुन् गृहमन्त्री लेखकका प्रिय फौजदारी ‘प्रतिवादी’हरू

यो पनि पढ्नुहोस

भिजिट भिसा प्रकरणमा गृहमन्त्री : गलत काम भएको दिन राजनीतिमा देखा पर्दिनँ (भिडिओ)

यो पनि पढ्नुहोस

कांग्रेस बैठकमा गृहमन्त्री लेखक- ‘मलाई नै फोन गरेर राजीनामा देऊ भनेको भए हुन्थ्यो नि’

यो पनि पढ्नुहोस

गृहमन्त्रीको प्रश्न- कर्मचारीमाथि अनुसन्धान हुँदा मैले राजीनामा दिनुपर्ने ?