तरूण दलको लमजुङ अधिवेशनमा खुकुरी हान्ने पक्राउ

News Summary

Generated by OK AI. Editorially reviewed.

लमजुङमा नेपाली कांग्रेसको तरुण दलको अधिवेशनमा विवाद हुँदा खुकुरी प्रहार भएको थियो।
प्रहरीले खुकुरी हान्ने ४२ वर्षीय किरण गुरुङलाई पक्राउ गरी अनुसन्धान गरिरहेको छ।
घाइते भएका व्यक्तिहरूमा विभिन्न पदाधिकारी र सदस्यहरू रहेका छन्।

१४ जेठ, काठमाडौं। नेपाली कांग्रेसको भातृ संस्था तरूण दलको लमजुङ अधिवेशनमा दुई पक्षको विवादमा खुकुरी हान्ने व्‍यक्तिलाई प्रहरीले पक्राउ गरेको छ ।

पक्राउ पर्नेमा लमजुङ मध्यनेपाल नगरपालिका-६ बस्ने ४२ वर्षीय किरण गुरुङ रहेका छन् ।

पक्राउ परेका उनीमाथि लमजुङ जिल्ला अदालतबाट ज्यान मार्ने उद्योग सम्बन्धी कसूर मुद्दामा ७ दिनको म्याद थप अनुमति लिई अनुसन्धान भइरहेको प्रहरीले जनाएको छ ।

पाँचौँ जिल्ला अधिवेशनको उद्घाटन सत्रमा बेसीसहर बजारमै दुई मन्त्रीको द्वन्द्वले खुकुरी प्रहार भएको थियो ।

खुकुरी प्रहारबाट नगरपालिका–९ का वडाअध्यक्ष समेत रहेका तरुण दलका क्षेत्रीय सभापति खुसीजंग गुरुङ, नेपाली कांग्रेस लमजुङका जिल्ला कार्यसमिति सदस्य किशोरजंग बस्नेत, नेपाल विद्यार्थी संघका केन्द्रीय सदस्य सुदीप अधिकारी र नेपाल तरुण दलका सदस्य शंकर सापकोटा घाइते भएका थिए ।

संस्थापन समूहका गुरुङ पक्षधरले पूर्णकालीन सदस्य हटाउने, प्रतिनिधि छनोटमै रोक्ने काम गरेको विरोध गर्दा ज्यान मार्ने मनसायले खुकुरी प्रहार भएको थियो । घाइतेहरू सबै संस्थापन इतर थिए ।

तरुण दलको जिल्ला अध्यक्षको आकांक्षीसमेत रहेका खुसीजंग, नेता भीम गुरुङ, बेसीसहर नगर सभापति विशाल अधिकारीलगायतलाई पूर्णकालीन सदस्यबाट हटाएर प्रतिनिधि बन्नबाट रोकिएको भन्दै भेषबहादुर समूहले विरोध गरेका थिए । कांग्रेसका भातृ संगठनहरू नै कब्जा गर्ने रणनीति टकराज समूहको भएको भन्दै नाराबाजीसमेत भएको थियो ।

अधिवेशनमा तरुण दलका केन्द्रीय अध्यक्ष विद्धान गुरुङ, गण्डकी प्रदेशका आर्थिक मामिलामन्त्री डा. टकराज गुरुङ, वनमन्त्री भेषबहादुर पौडेलसमेत सहभागी थिए ।