गाजामा राहत वितरणस्थलनजिकै इजरायलको आक्रमण, ३० जनाको मृत्यु

News Summary

Generated by OK AI. Editorially reviewed.

इजरायलले गाजामा राहत वितरण स्थलनजिकै आक्रमण गर्दा ३० जनाको मृत्यु भएकाे छ।
आक्रमणबारे इजरायलले हालसम्म कुनै प्रतिक्रिया दिएको छैन।
अन्तर्राष्ट्रिय संस्थाहरुले जीएफको तटस्थतामाथि प्रश्न उठाउँदै आएका छन्।

१८ जेठ, काठमाडौं । गाजामा मानवीय सहायता वितरण गरिरहेको स्थल नजिकै इजरायलले आक्रमण गर्दा ३० जनाको मृत्यु भएको छ । इजरायलले गाजा ह्युमनटेरियन फाउन्डेसन (जीएफ) ले गाजाको राफामा राहत वितरण गरिरहेको स्थलनजिकै आइतबार आक्रमण गरेको हो ।

आक्रमणमा एक सय १५ जना घाइते भएका प्यालेस्टाइनी संचारमाध्यम र हमास नियन्त्रित संचामाध्यमलाई उद्धृत गर्दै समाचार संस्था रोयटर्सले जनाएको छ । इजरायलले भने आक्रमणबारे कुनै प्रतिक्रिया दिएको छैन ।

अमेरिका र इजरायल समर्थित जीएचएफ नामक संस्थालाई राष्ट्रसंघले मान्यता दिएको छैन । जीएचएफले गाजामा राहत वितरण र मानवीयता सहायता पुर्याइरहेको दाबी गरिएपनि उसले इजरायल र अमेरिकाका लागि खुफिया एजेन्सीका काम गरिरहेको आरोप लाग्दै आएको छ ।

प्यालेस्टाइनले जीएचएफको तटस्थता र इजरायलले प्रयोग गर्ने बायोमेट्रिक तथा अन्य जाँचहरुबारे चिन्ता व्यक्त गर्दै आएको छ । इजरायली अधिकारीहरुले भने गाजामा जीएचएफले वितरण गर्ने भोजन लगायतका मानवीय सहयोगमा विद्रोही समूह हमासको पहुँच निषेध गर्न जाँचको अधिकार दिइएको तर्क गर्दै आएका छन् ।

२८ मे मा पनि इजरायलले जीएचएफको साइट नजिकै कम्तीमा तीन प्यालेस्टाइनी नागरिकको हत्या गरेको र सो घटनामा ४६ जना घाइते भएको हमासले आरोप लगाएको थियो । जीएचएफले उक्त आरोपलाई अस्वीकार गरेको छ ।

इजरायलले पनि राहत वितरण स्थलमा हजारौं प्यालेस्टाइनीहरुको भागदौड मच्चिएपछि नियन्त्रणको लागि गोली चलाउनुपरेको भन्दै आक्रमणको बचाउ गरेको रोयटर्सले लेखेको छ ।