पोर्चुगलको पीआर पाउन नेपालीले भोग्ने सकसको कथामा ‘रातो पासपोर्ट’ बन्ने

काठमाडौं । कथानक फिल्म ‘रातो पासपोर्ट’ निर्माण हुने भएको छ । युरोपेली मुलुकको नागरिकता प्राप्त गर्ने उद्देश्यले त्यहाँ पुगेका नेपालीले गर्ने संघर्ष र सकसको कथावस्तु यसमा हुनेछ ।

सि-बड्र्स पिक्चर्स र होप्स बजको प्रस्तुति, ट्राइडेन्ट कन्सेप्टको सहकार्यमा बन्न लागेको फिल्मको निर्देशन सिमसोन तामाङले गर्दैछन् । कथा माइकल तामाङले लेखेका हुन् । पटकथा तथा संवाद प्रदीपकुमार चौधरीले लेखेका हुन् ।

निर्माताले केही दिनदेखि नै दर्शकलाई यसबारे टिजिङ गरिरहेका थिए । उनीहरूले लेखेका थिए, ‘सबै भन्छन्- त्यता गएपछि सेटल भइन्छ रे । परिवारको भविष्य सुरक्षित हुन्छ रे । रातो पासपोर्ट पाइन्छ रे ।’ निर्माताको यो पोस्टमै फिल्मको कथासार लुकेको बुझ्न सकिन्छ ।

औपचारिक निर्माण घोषणा भने ‘मिनिमल पोस्टर’ सार्वजनिक गर्दै आइतबार मात्र भएको हो । पोस्टरको थिम युरोपेली देश पोर्चुगलको पासपोर्टको कभर पेजको स्टाइलमा तयार पारिएको छ ।

पोर्चुगलले ३ हजार भन्दा बढी नेपालीको अस्थायी आवास अनुरोध अस्वीकार गर्दै देश छाड्न सूचित गरेको एकदिनपछि निर्माताले सोही कथावस्तुमा फिल्म बनाउने घोषणा गर्नु संयोग मात्र हुनेछ ।

यो फिल्मको लगानीकर्तामा लोकबहादुर तामाङ छन् । प्रवेश पौडेल कार्यकारी निर्माताको भूमिकामा रहनेछन् । पौडेलले यसअघि ‘अमेरिका ब्वायज’ र ‘बिहे पास’ फिचर निर्देशन गरेका थिए ।

मेकअप तथा एसएफएक्सका लागि अमृत मरहट्ठा, छायाँकारमा रवीन्द्र न्यौपाने, संगीतकारको रुपमा जयन जे वाइबा जोडिएका छन् । पोस्टर तथा पब्लिसिटी डिजाइन रोयल भीमसेनले गर्नेछन् ।

निर्देशक तामाङ घरेलु फिल्ममा एक्सन निर्देशक तथा प्रमुख सहायक एक्सन निर्देशकका रूपमा लामो समयदेखि सक्रिय छन् । कलाकार तथा क्रू सदस्य नेपालबाट चाँडै नै छनौट गरिने भएको छ ।

युरोप र बेलायतमा रहेका कलाकारलाई अडिसनमार्फत छनोट गरिने भएको छ । छायाङ्कन पोर्चुगल, युरोपका अन्य केही देश र नेपालमा हुने जनाइएको छ ।