नहरमा मृत भेटिएकी वृद्धाको गहना लुकाउने महिला पक्राउ, घटना शंकास्पद

News Summary

Generated by OK AI. Editorially reviewed.

प्रहरीले सुनसरी मोरङ सिँचाइ आयोजनाको नहरमा वृद्धाको शव भेटिएपछि महिलालाई पक्राउ गरेको छ।
८९ वर्षीया तिलमाया खड्का शनिबार घरबाटै हराएकी थिइन् । शव भेटिएको स्थान नजिकैको घरमा खड्काले लगाउने कपडा र गहना फेला परेको छ।
महिलाले घटनामा संलग्नता स्वीकार गरेकी छैनन् र थप अनुसन्धान भइरहेको प्रहरीले जनाएको छ।.

२६ जेठ, विराटनगर । सुनसरी मोरङ सिँचाइ आयोजनाको नहरमा एक जना वृद्धाको शव भेटिएपछि प्रहरीले एक जना महिलालाई पक्राउ गरेको छ ।

मोरङको ग्रामथान गाउँपालिका–७ की ८९ वर्षीया तिलमाया खड्काको शव आइतबार अपरान्ह सुनसरी मोरङ सिँचाइ आयोजनाको ग्रामथान–६ खण्डमा भेटिएको हो ।

वृद्धाको कपडा भने शव भेटिएको स्थान नजिकै ग्रामथान–६ की ४० वर्षीया सीता ऋषिदेवको घरमा फेला परेको छ । वृद्धाले लगाएको गहना पनि उनकै घरमा फेला परेको छ ।

कपडा र सुनको गहना भेटिएपछि सीतालाई नियन्त्रणमा लिएर अनुसन्धान सुरु गरेको जिल्ला प्रहरी कार्यालय मोरङकी डीएसपी कोपिला चुडालले जानकारी दिइन् ।

सीताले घरभित्र खाल्डो खनेर वृद्धाको गहना लुकाएको अवस्थामा भेटिएको उनले बताइन् ।

घटना शंकास्पद देखिएपछि ऋषिदेवलाई नियन्त्रणमा लिएर अनुसन्धानका लागि सात दिन म्याद थप गरेको उनले बताइन् ।

मानसिक अवस्था कमजोर भएकी तिलमाया शनिबार घरबाटै हराएकी थिइन् ।

सीताकी छोरीले वृद्धालाई बचाए पनि गहनाको लोभमा आमाले नहरमा धकेलिदिएको खुलेको प्रहरी स्रोतको दाबी छ ।

दिउँसो नहरमा डुबेको अवस्थामा देखेपछि सीताकी छोरी सोनुले उनलाई निकालेर आफ्नै घरमा लगेर भिजेको कपडा फेरिदिएकी थिइन् । कपडा फेरेर उनी नजिकै रहेको मामाघर गएकी थिइन् ।

उनले फेरिदिएको कपडा सीता कै घरमा थियो । सोही कपडाका आधारमा घटना शंकास्पद देखिएको प्रहरीले बताएको छ ।

‘पक्राउ परेकी महिलाले घटनामा संलग्नता स्वीकार गरेकी छैनन, अनुसन्धान भइरहेको छ,’ डिएसपी चुडालले भनिन,‘ पोष्टमार्टम रिपोर्ट आएपछि थप विषय खुल्छ ।’