२०८२ जेठ २७ गते ७:०५ 
News Summary
Generated by OK AI. Editorially reviewed.- वेस्ट इन्डिजका विस्फोटक ब्याटर निकोलस पूरनले २९ वर्षको उमेरमै अन्तर्राष्ट्रिय क्रिकेटबाट सन्यास घोषणा गरे।
- पूरनले ६१ ओडिआई र १०६ टी-२०आई खेल खेलेका थिए र फ्रेन्चाइज क्रिकेटमा ध्यान केन्द्रित गर्नेछन्।
- क्रिकेट वेस्ट इन्डिजले पूरनप्रति सम्मान व्यक्त गर्दै भविष्यका लागि शुभकामना व्यक्त गरेको छ।
२७ जेठ, काठमाडौं । वेस्ट इन्डिजका विस्फोटक ब्याटर निकोलस पूरनले २९ वर्षको उमेरमै अन्तर्राष्ट्रिय क्रिकेटबाट सन्यासको घोषणा गरेका छन् ।
विश्वकै उत्कृष्ट टी-२० ब्याटरमध्ये एक रहेका पूरन आक्रामक ब्याटिङका लागि परिचित छन् । ट्रिनिडाडका पूरनले वेस्ट इन्डिजका लागि ६१ ओडिआई र १०६ टी-२०आई खेल खेलेका थिए।
पूरनले ओडिआईमा ६१ खेलमा ३ शतक र ११ अर्धशतकसहित १९८३ रन बनाएका छन् । त्यस्तै टी-२०आईमा १०६ खेलमा १३ अर्धशतकसहित २२७५ रन बनाएका छन् ।
अब उनी विभिन्न फ्रेन्चाइज लिगहरूमा ध्यान केन्द्रित गर्नेछन्। पूरनले हालै इन्डियन प्रिमियर लिग (आईपीएल) मा लखनउ सुपर जायन्ट्सबाट खेलेका थिए।
त्यसपछि आराम गर्ने भन्दै उनले इंग्ल्यान्डविरुद्धको टी-२० सिरिजमा सहभागी भएनन्। उनी यसै समरमा अमेरिकाको मेजर लिग क्रिकेट (एमएलसी) र बेलायतको द हन्ड्रेड लिगमा पनि खेल्ने तयारीमा छन्।
क्रिकेट वेस्ट इन्डिजले पूरनप्रति सम्मान व्यक्त गर्दै भनेको छ, ‘हामी उनका उपलब्धिहरूलाई सम्मान गर्छौं र उनले दर्शकहरूलाई दिएका रमाइला क्षणहरूका लागि धन्यवाद दिन्छौं। भविष्यका लागि शुभकामना।’
हालै दक्षिण अफ्रिकाका हेनरिक क्लासेनले पनि फ्रेन्चाइज क्रिकेटलाई प्राथमिकता दिँदै अन्तर्राष्ट्रिय क्रिकेट छाडेका थिए। तर पूरनको निर्णय अझ ठूलो मानिएको छ, किनकि उनी युवा र लोकप्रिय छन्।
पूरनले वेस्ट इन्डिजका लागि अन्तिम टी-२० खेल सन् २०२४ डिसेम्बरमा बंगलादेशविरुद्ध खेलेका थिए। उनले जुलाई २०२३ पछि कुनै एकदिवसीय खेल खेलेका छैनन् ।
उनी टी-२० अन्तर्राष्ट्रियमा वेस्ट इन्डिजबाट सबैभन्दा बढी खेल खेलेर सर्वाधिक रन बनाउने खेलाडी हुन् ।
प्रतिक्रिया 4