गोली हानेर नियन्त्रणमा लिइएका २ जनालाई ट्रमा पठाइयो

News Summary

Generated by OK AI. Editorially reviewed.

प्रहरीले लागुऔषध कारोबारको सूचनाका आधारमा दुई भारतीय नागरिकलाई गोली हानी नियन्त्रणमा लिइएको छ।
उनीहरूलाई उपचारका लागि राष्ट्रिय ट्रमा सेन्टर ल्याइएको छ र अवस्था खतरामुक्त रहेको बताइएको छ।

२७ जेठ, काठमाडौं । लागुऔषध कारोबारको गरेको सूचना पाएपछि प्रहरीले गोली चलाएर नियन्त्रणमा लिइएका दुई जनालाई उपचारका लागि राष्ट्रिय ट्रमा सेन्टर ल्याइएको छ ।

ट्रमा सेन्टरमा उपचार हुनेहरूमा भारत पश्चिम बंगाल घर भएका ४० वर्षीय सशीक आलम र सोही ठाउँका १८ वर्षीय मोहमद मञ्जियार छन् । उनीहरू दुवै जनालाई घुँडामुनि गोली लागेको छ । प्रहरीका अनुसार मञ्जियारलाई दुई र सशीकलाई एक गोली लागेको छ ।

दुवैको अवस्था खतरामुक्त रहेको प्रहरीले बताएको छ । यही समूहका दुई जनालाई भने लागुऔषध नियन्त्रण ब्यूरो कोटेश्वरको टोलीले हिरासतमा रोखको छ । हिरासतमा रहनेमा १८ वर्षका भारतीय नागरिक सुमीतकुमार र भारतकै २५ वर्षीय चन्दनकुमार छन् । सुरुमा प्रहरीले दुई जनालाई सुन्धाराबाट पक्राउ गरेको थियो ।

उनीहरूकै सूचनाका आधारमा अपरेसन गर्दा टोखाको ग्राण्डी नजिक थप दुई भारतीय लागुऔषध कारोबारी फेला परेको ब्यूरोका एसएसपी कृष्ण कोइरालाले बताए ।

सुरुमा प्रहरीले चार राउन्ड हवाई फायर गर्दै उनीहरूलाई नियन्त्रणमा लिने प्रयास गरेको थियो । तर पनि उनीहरू फरार भएको प्रहरीले बताएको छ । त्यसपछि प्रहरीले घुँडामुनि गोली हानेर उनीहरूलाई नियन्त्रणमा लिएको हो ।