लमहीको होटलमा गोली चल्दा एकजना घाइते

News Summary

Generated by OK AI. Editorially reviewed.

मंसिर २० गते लमही सुनचाँदी पसलमा गोली प्रहार हुँदा पसल सञ्चालक घाइते भएका थिए।
मंसिर २७ गते बिहान लमही रातोडाँडास्थित रोयल प्यालेस होटलमा पेस्तोल पड्किँदा १८ वर्षीय सिसम गौतम घाइते भएका छन्।
एकपछि अर्को गोली काण्डले सुरक्षा चुनौति बढाएको भन्दै स्थानीय चिन्तित छन् ।

२७ मंसिर, काठमाडौं । दाङ देउखुरीको लमहीमा सुनचाँदी पसलका सञ्चालकमाथि गोली प्रहार भएको एक सातापछि होटलमा पनि गोली चलेको छ । आज शनिबार बिहान लमहीकै रातोडाँडास्थित होटलमा गोली चल्दा एक जना घाइते भएका छन् ।

रातोडाँडामा रहेको रोयल प्यालेस होटलमा पेस्तोलबाट गोली पड्किँदा सोही होटलमा कार्यरत १८ वर्षीय सिसम गौतम घाइते भएका प्रहरीले जनाएको छ ।

गौतमको हातको औंलामा चोट लागेको र उनको अवस्था सामान्य रहेको जिल्ला प्रहरी कार्यालय दाङका प्रवक्ता चक्रबहादुर शाहले जानकारी दिए ।

घाइते गौतमका अनुसार कोठा सफा गर्ने क्रममा एअर कन्डिसन (एसी) माथि राखिएको पेस्तोल अचानक पड्किएको थियो । त्यो पेस्तोल कसको हो र त्यहाँ किन राखिएको हो भन्ने खुलेको छैन ।

घटनाबारे जानकारी पाउनासाथ वडा प्रहरी कार्यालय लमहीका प्रहरी निरीक्षक रोशनराज पाण्डे नेतृत्वको टोली सो होटलमा पुगेको थियो । पाण्डेले घटनाबारे अनुसन्धान भइरहेको बताए ।

यसअघि यही मंसिर २० गते लमही बजारको जुनतारा सुनचाँदी पसलमा लुटपाट गर्ने उद्देश्यले आएका व्यक्तिले पेस्तोलबाट गोली चलाउँदा पसल सञ्चालक घाइते भएका थिए ।

त्यसको एक सातापछि आज बिहान करिब ११ बजे लमहीकै होटलमा पेस्तोलबाट गोली पड्किएको हो । यसले सुरक्षा चिन्ता बढाएको एक स्थानीयले बताए ।

यही मंसिर २२ गते मात्रै लमहीबजारमा रहेको होटल अर्घाखाँची एण्ड लजका सञ्चालक ४५ वर्षीय केशवराज खनाल होटलभित्रै मृत फेला परेका थिए ।