‘नाफा साझेदार’को रुपमा विपिन कार्कीले साइन् गरे ‘भाइटीका’

काठमाडौं । अभिनेता विपिन कार्की निर्माता रोहित अधिकारीको आगामी फिल्म ‘भाइटीका’को शीर्ष भूमिकामा अनुबन्धित भएका छन् । यो फिल्ममा उनी मुनाफा साझेदारको रुपमा जोडिएका हुन् ।

पछिल्लो समय कलाकारले पारिश्रमिकको रुपमा लाखौं रुपैयाँ लिन थालेको भन्ने चर्चाबीच अहिलेका ‘डिमान्डेड’ अभिनेता मुनाफा साझेदारको रुपमा जोडिनुलाई अर्थपूर्ण रुपमा लिइएको छ ।

‘कथाले उहाँको हृदयलाई छोएछ । त्यसपछि उहाँ स्क्रिप्ट लेखनमा सुरुदेखि नै बस्न तयार हुनुभयो । साथै, नाफाको राम्रो पर्सेन्टेजमा बस्न तयार हुनुभयो’ निर्माता अधिकारीले अनलाइनखबरसँग भने ।

कार्कीबाहेकका अन्य कलाकारको कास्टिङबारे टुंगो लाग्न बाँकी रहेको जनाइएको छ । दिदीभाईको मर्मस्पर्शी कथामा बन्ने बताइएको फिल्ममा विपिनले दाईको भूमिका निर्वाह गर्दैछन् ।

‘बीसौं वर्षदेखि दाईलाई टीका लगाउन नपाएको बहिनीको कथा हो । यो कथाले विपिनजीलाई छोएछ । सबै छाडेर भएपनि स्क्रिप्टमा बस्छु भन्नुभयो । कथाले जीवन्त महसुस गराएको बताउनुभयो’ रोहितले भने ।

२०८२ सालको सुपरहिट फिल्म ‘ऊनको स्वीटर’पछि अभिनेता कार्कीले ‘भाइटीका’ साइन् गरेका हुन् । दीपक वलीले निर्देशन गर्ने यो ‘भाइटीका’को पटकथा महेश दवाडीको हुनेछ । २०८२ सालमा छायांकन हुने फिल्मको प्रदर्शन २०८३ सालको तिहार छेकोमा हुने अपेक्षा छ ।

अभिनेता कार्की ‘काजी’को छायांकनपछि ‘भाइटीका’मा ब्यस्त हुनेछन् । यसबाहेक निर्माता अधिकारीको पछिल्लो फिल्म ‘माइतीघर’ दशैंको फूलपातीमा प्रदर्शन तयारीमा छ ।