भानु जयन्तीमा र्‍याली र सम्मान (तस्वीरहरू)

News Summary

Generated by OK AI. Editorially reviewed.

२१२ औं भानु जयन्ती राष्ट्रिय प्रज्ञा प्रतिष्ठानले काठमाडौंमा र्‍यालीसहित विविध कार्यक्रम गरी मनाएको छ।
सभामुख देवराज घिमिरे, शिक्षा मन्त्री रघुजी पन्त र साहित्यकार डा. नवराज लम्साल कार्यक्रममा सहभागी थिए।
तनहुँको भानु नगरपालिकाले भानुजयन्तीका अवसरमा सार्वजनिक विदा दिएको छ।

२९ असार, काठमाडौं । २१२ औं भानु जयन्ती आज विविध कार्यक्रम गरी मनाइँदै छ । यसै अवसरमा राष्ट्रिय प्रज्ञा प्रतिष्ठानले काठमाडौंमा र्‍यालीसहित कार्यक्रम गरेको छ । कार्यक्रममा सभामुख देवराज घिमिरे, शिक्षा मन्त्री रघुजी पन्त, साहित्यकार डा. नवराज लम्साल लगायत सहभागी थिए ।

कार्यक्रममा साहित्य तथा संस्कृतिविद तुलसी दिवसलाई अभिनन्दन गरिएको थियो ।

कमलादीस्थित प्रज्ञा भवनमा कार्यक्रम सुरु हुनुअघि विद्यार्थी, कर्मचारी र नेपाली सेनाको ब्याण्ड टोली समेतको सहभागितामा र्‍याली निकालिएको थियो । भानुभक्तको तस्वीरलाई बग्गीमा राखिएको थियो ।

भानुभक्तले रचना गरेका कृतिका पात्रहरुको पोशाकमा विद्यार्थीहरु सजिएका थिए । उनले नेपालीमा अनुवाद गरेको रामायणको कथाका पात्र रावण, राम–सीता, ऋषि अनि चर्चित घाँसी कविताको मुख्य पात्र घाँसीको रुपमा पनि विद्यार्थीहरु देखिन्थे । र्‍यालीमा सहभागीहरुले रामायणका फोटाहरु समेत बोकेका थिए ।

वि.सं. १८७१ असार २९ गते तनहुँको चुँदीरम्घा गाउँमा जन्मिएका भानुभक्तको निधन वि.सं. १९२५ असोजमा भएको थियो । भानुजयन्तीका अवसरमा सोमबार तनहुँको भानु नगरपालिकाले सार्बजनिक विदा दिएको छ ।

भानुभक्तको जन्मजयन्ती भारतको दार्जिलिङ, सिक्किमलगायत नेपाली भाषा धेरै रहेका स्थानमा पनि मनाइन्छ ।