२०८२ असार ३० गते १६:३९ 
News Summary
Generated by OK AI. Editorially reviewed.- पूर्वप्रधानमन्त्री पुष्पकमल दाहाल ‘प्रचण्ड’ले कीर्तिपुर अन्तर्राष्ट्रिय क्रिकेट रंगशालाको निर्माणमा ढिलाइ भएको भन्दै प्रश्न उठाए।
- प्रधानमन्त्री केपी शर्मा ओलीले सामाजिक सञ्जालमार्फत फ्लडलाइट र प्यारापिट जडान भइरहेको र काम भइरहेको स्पष्ट पार्दै प्रचण्डमाथि व्यंग्य गरे।
- ओलीले प्रचण्ड नेतृत्वको सरकारले छाडेको अर्थतन्त्रको अवस्था हेर्न सुझाव दिए र प्रचण्डले सरकार परिवर्तनपछि रंगशाला निर्माण ढिलाइ भएको प्रश्न उठाएका थिए।
३० असार, काठमाडौं । पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले कीर्तिपुरस्थित अन्तर्राष्ट्रिय क्रिकेट रंगशालाको निर्माणमा ढिलाइ भएको भन्दै प्रश्न उठाएपछि प्रधानमन्त्री केपी शर्मा ओलीले प्रतिक्रिया जनाएका छन्।
प्रधानमन्त्री ओलीले सामाजिक सञ्जालमार्फत प्रचण्डको प्रश्नको जवाफ दिँदै भने, ‘कीर्तिपुरको मैदानमा खोई फ्लडलाइट ? खोई प्यारापिट ? भनेर प्रश्न गर्नु भयो। म आग्रह गर्छु, बनिरहेको प्यारापिट हेर्न जानुस्, जडान हुँदै गरेको फ्लडलाइटका पोलहरू पनि हेर्न जानुस्। बनिरहेको छ।’
ओलीले आफूले योजनाहरू टाइमलाइनसहित अघि सारेको र त्यसमा काम भइरहेको प्रष्ट पार्दै प्रचण्डमाथि व्यंग्य पनि गरे। ‘तपाईं प्रधानमन्त्री हुँदा कुनै पनि काममा टाइमलाइन तोकेर गर्छु भन्नु भएन। तपाईंका त न कुनै वाचा, न कुनै निर्णय, न कुनै संकल्प, न कुनै काम’ ओलीले कटाक्ष गर्दै भने, ‘मैले त दिन तोकेर गर्छु भनें, आफैंमाथि प्रश्न आह्वान गरें, र काम पनि गरें।’
प्रधानमन्त्री ओलीले प्रचण्ड नेतृत्वको सरकारले छाडेर गएको अर्थतन्त्रको अवस्थाबारे पनि टिप्पणी गरे। ‘तपाईंले जर्जर बनाएको अर्थतन्त्र अहिले कहाँ पुगेको छ, तथ्याङ्क हेर्नुस् भन्ने सुझाव दिन चाहन्छु’ उनले थपे।
यसअघि प्रचण्डले प्रतिनिधिसभामा सम्बोधनका क्रममा उनकै नेतृत्वको सरकारले कीर्तिपुर रंगशालामा फ्लडलाइट जडानका लागि ठेक्का सम्झौता गरिसकेको तर त्यसपछि सरकार परिवर्तन भएर ओली सरकारले ३०० दिनभित्र रंगशाला निर्माण सम्पन्न गर्ने घोषणा गरेको एक वर्ष बितिसक्दा पनि काम सम्पन्न नभएको भन्दै सरकारमाथि प्रश्न उठाएका थिए।
प्रतिक्रिया 4