सिँचाइ गर्ने क्रममा करेन्ट लागेर रौतहटमा ३ दिनमा ३ किसानको मृत्यु

News Summary

Generated by OK AI. Editorially reviewed.

रौतहटको मौलापुर नगरपालिका-७ पथरा गाउँका ४८ वर्षीय चन्देश्वर बैठालाई करेन्ट लागेर मृत्यु भएको छ।
तीन दिनमा रौतहटमा करेन्ट लागेर तीन जनाको मृत्यु भइसकेको छ।
साउन महिनामा रौतहटमा करेन्ट लागेर चार जनाले ज्यान गुमाइसकेका छन्।

८ साउन, जनकपुरधाम । रौतहटमा करेन्ट लागेर थप एक जना किसानको मृत्यु भएको छ ।

मृत्यु हुनेमा रौतहटको मौलापुर नगरपालिका-७ पथरा गाउँका ४८ वर्षीय चन्देश्वर बैठा छन् । बैठा बिहीबार दिउँसो धान खेतमा पानी लगाउन गएका थिए । त्यही बेला अर्का किसान मोसाफिर साह तेली पनि आफ्नो खेतमा सिँचाइ गर्न पुगेका थिए ।

तेलीले विद्युतीय मोटर चलाएर सिँचाइ गरिरहेको समयमा तार सर्ट हुन पुग्दा बैठालाई करेन्ट लाग्न पुगेको रौतहटका प्रहरी प्रवक्ता डीएसपी दीपककुमार रायले जानकारी दिए ।

अपराह्न ४ बजेतिर करेन्ट लागरे घाइते भएका बैठालाई उपचारका लागि गौर प्रादेशिक अस्पताल पुर्‍याउँदा चिकित्सकले उनलाई मृत घोषणा गरेको डीएसपी रायले बताए ।

घटनाबारे थप अनुसन्धान भइरहेको उनले बताए ।

यो घटनासँगै रौतहटमा तीन दिन यता करेन्ट लागेर मृत्यु हुनेको संख्या तीन पुगेको छ ।

यसअघि खेतमा सिँचाइ गर्ने क्रममा बुधबार बिहान मोटरमा जडान गरिएको तार सर्ट भएर करेन्ट लाग्दा माधवनारायण नगरपालिका-४ विसुनपूर्वा मानपुरका रामबाबु मुखियाको मृत्यु भएको थियो ।