२०८२ साउन २० गते ९:०७ 
News Summary
Generated by OK AI. Editorially reviewed.- अन्जन विष्ट सम्मिलित रियल कश्मीर एफसीले डुरान्ड कपमा पहिलो जित हात पारेको छ।
- रियल कश्मीर दुई खेलमा ३ अंकसहित समूह एफको दोस्रो स्थानमा रहेको छ।
- त्रिभुवन आर्मी एफसीले समूह सी अन्तिम खेल आज इन्डियन आर्मीसँग खेल्नेछ।
२० साउन, काठमाडौं । नेपाली राष्ट्रिय फुटबल टोलीका फरवार्ड अन्जन विष्ट सम्मिलित रियल कश्मीर एफसीले डुरान्ड कपमा पहिलो जित हात पारेको छ ।
समूह एफ अन्तर्गत सोमवार भएको खेलमा रियल कश्मीरले ट्राउ एफसीलाई २-१ ले पराजित गरेको हो । रियल कश्मीरको जितमा मरात तारेक र रोहेन सिंहले गोल गरे । ट्राउका अफ्रिदी बुइमायुमले गोल गरे।
मणिपालस्थित खुमन लम्पाक रंगशालामा भएको खेलमा तारेकले २५औं मिनेटमा गोल गर्दै रियल कश्मीरलाई अग्रता दिलाएका थिए । तर, त्यसको दुई मिनेटपछि नै ट्राउका अफ्रिदीले बराबरी गोल फर्काएपछि खेल रोमाञ्चक बनेको थियो । कश्मीरका लागि रोहेनले ६४औं मिनेटमा गोल गरे ।
पहिलो खेलमा रियल कश्मीर इन्डियन नेभीसँग २-१ ले पराजित भएको थियो । दुई खेलपछि ३ अंकका साथ रियल कश्मीर समूह एफको दोस्रो स्थानमा छ । लगातार खेलमा पराजित ट्राउ अंकविहिन हुँदै पुछारमा छ । इण्डियन नेभी ३ अंकसहित समूह एफको शीर्ष स्थानमा छ ।
रियल कश्मीर समूह चरणको अन्तिम खेल अगस्ट १० मा नेरोका एफसीसँग खेल्नेछ ।
नेपालबाट त्रिभुवन आर्मी एफसीले डुरान्ड कपमा प्रतिस्पर्धा गरिरहेको छ । समूह सी मा रहेको त्रिभुवन आर्मीले आफ्नो समूहको अन्तिम खेल आजै इन्डियन आर्मीसँग खेल्नेछ । यसअघि जम्सेदपुर एफसीसँग पराजित भएको आर्मीले वान लद्दाकसँग १-१ को बराबरी खेलेको थियो ।
डुरान्ड कपमा २४ टोलीको सहभागिता छ । सहभागी टोलीलाई ६ समूहमा विभाजन गरिएको छ । हरेक समूहको विजेता र उपविजेता मध्ये उत्कृष्ट २ टोलीसहित ८ टोली क्वाटरफाइनल प्रवेश गर्नेछ ।
प्रतिक्रिया 4