कोशीमा सुरु भयो ‘उदय’ परियोजना, रोजगारीको अवसर सिर्जना गर्ने लक्ष्य

१३ भदौ, विराटनगर । कोशी प्रदेशमा साना तथा मझौला व्यवसायको प्रवर्द्धन र उद्यमशीलताको विकासका लागि स्विस सरकारको सहयोगमा ‘उदय’ परियोजना सुरु भएको छ ।

परियोजनाअन्तर्गत प्रदेश सरकार जमानी बसेर नवउद्यमीलाई बिना धितो ३० लाखदेखि ३ करोडसम्मको कर्जा उपलब्ध गराइनेछ । जसले प्रदेशमा नयाँ रोजगारीको अवसर सिर्जना गर्ने विश्वास छ ।

६० करोडको ग्यारेन्टी फन्डमार्फत ८ अर्ब बराबरको नवउद्यमी कर्जाका लागि ज्ञारेन्टी गर्ने सरकारको तयारी छ । २८ करोडको च्यालेञ्ज फन्डमार्फत नवउद्यमीको प्रतिस्पर्धात्मक क्षमता विकास गर्ने सरकारी लक्ष्य छ । इनफर्मेसन पोर्टलमार्फत बजारसम्बन्धी सूचना उपलब्ध गराउने व्यवस्था पनि परियोजनाले गर्नेछ ।

परियोजनाको प्रभावकारी कार्यान्वयनका लागि कार्यविधि तयार भइसकेको र अब कार्यान्वयन चरणमा प्रवेश गरेको प्रदेश सरकारले जनाएको छ ।

परियोजनालाई प्रदेश सरकारले प्रदेशका १४ वटा जिल्लामा पुर्याउने लक्ष्य राखेको छ । पहिलो चरणमा चार वर्षसम्म सञ्चालन हुने यो परियोजनाबाट कोशी प्रदेशमा ३ हजार रोजगारी सिर्जना हुने बताइएको छ ।

मुख्यमन्त्री हिक्मतकुमार कार्कीले उदय परियोजनालाई कोशी प्रदेशमा नमुनाका रूपमा सफल बनाएर देशव्यापी रूपमा उदाहरणीय बनाउने बताए ।

परियोजनाका व्यवसाय विकास प्रमुख विष्णु काफ्लेले परियोजना १० वर्षसम्म सञ्चालन गर्ने तयारी रहेको बताए ।

उदय परियोजनाका टिम लिडर अरुण राणाले यो परियोजना मार्फत नयाँ उद्यम गर्न चाहने र उद्यम गरिरहेकाहरूलाई सहज हुने बताए ।

मुख्यमन्त्रीका आर्थिक सल्लाहकार डा. मोहन सुवेदीले परियोजनाबाट कोशी प्रदेशको आर्थिक विकासलाई सहज हुने बताए ।