२०८२ भदौ १३ गते १७:१६ 
News Summary
Generated by OK AI. Editorially reviewed.- अर्जेन्टिनाका कप्तान लियोनेल मेस्सीले भेनेजुएलाविरुद्ध अन्तिम घरेलु विश्वकप छनोट खेल खेल्नेछन्।
- मेस्सीले २०८३ विश्वकपपछि अन्तर्राष्ट्रिय फुटबलबाट सन्यास लिन सक्ने संकेत दिएका छन्।
- यो खेललाई घरेलु मैदानमा अन्तिम खेलको रूपमा लिइएको छ।
१३ भदौ, काठमाडौं । अर्जेन्टिनाका कप्तान लियोनेल मेस्सीले आगामी बिहीबार राजधानी ब्युनस आयर्सस्थित मोनुमेन्टल स्टेडियममा भेनेजुएलाविरुद्ध हुने विश्वकप छनोटको खेल खेल्दै छन्।
३८ वर्षीय मेस्सीका लागि घरेलु मैदानमा हुने विश्वकप छनोटको अन्तिम खेल हुनेछ, वा भनौं उनको करियरकै अन्तिम घरेलु खेल पनि हुन सक्ने पक्कापक्की छ ।
त्यसकारण यस खेललाई विशेष मानिएको छ। अर्जेन्टिना पहिले नै २०२६ विश्वकपका लागि छनोट भइसकेको भए पनि यस खेलले भावनात्मक महत्व बोकेको छ।
मेस्सीले २०२६ विश्वकपपछि अन्तर्राष्ट्रिय फुटबलबाट सन्यास लिन सक्ने संकेत दिएका छन्। उनले नै आफ्नो यो अन्तिम घरेलु खेल हुन सक्ने कुरा पनि संकेत गरिसकेका छन् ।
एक सञ्चारमाध्यममा कुरा गर्दै उनले यस्तो भनेका छन्, ‘मलाई थाहा छैन भेनेजुएलापछि यहाँ मैत्रीपूर्ण खेल वा अन्य खेल हुनेछन् कि हुँदैनन्, तर यो खेल निकै विशेष छ। त्यसैले मेरो परिवार सबै त्यस खेलमा उपस्थित हुनेछन् । हामी यसलाई त्यस्तै विशेष क्षणका रूपमा लिनेछौं। त्यसपछि के हुन्छ, मलाई थाहा छैन।’
मेस्सीको यही भनाइका कारण पनि यो खेललाई घरेलु मैदानमा हुने प्रतीकात्मक बिदाइको रूपमा हेरिएको छ। उनका पत्नी, छोराछोरी, आमाबाबु र दाजुभाइ–बहिनी सबै स्टेडियममा उपस्थित हुनेछन्।
दक्षिण अमेरिकी फुटबल संघले ‘द लास्ट डान्स इज कमिङ’ भनेर मेस्सीको तस्वीर सार्वजनिक गरेको छ भने अर्जेन्टिनी फुटबल संघले टिकट मूल्य १०० देखि ५०० डलरसम्म तोकेको छ।
विश्वभरका समर्थकका नजर यस ऐतिहासिक क्षणमा केन्द्रित हुने निश्चित छ।
मेस्सीको कप्तानीमा अर्जेन्टिनाले गत संस्करणको विश्वकप फुटबलको उपाधि जितेको थियो ।
प्रतिक्रिया 4