पर्यटनका लागि हात्ती जस्ता जनावरलाई यति निर्मम र क्रुर तालिम दिइन्छ

सन् २०२० मा थाइल्याण्डमा पर्यटनका लागि हात्तीका बच्चालाई क्रुर तरिकाले यातना दिइरहेको भिडिओ सार्वजनिक भएको थियो । अस्ट्रेलियाको वर्ल्ड एनिमल प्रोटेक्सन नामक संस्थाले सार्वजनिक गरेको भिडियोमा हात्तीका बच्चालाई उनीहरूको आमाबाट छुट्याएर धारिलो वस्तुले घोचेको देखिन्थ्यो ।

उक्त भिडियोमा हात्तीलाई सिक्रीले बाँधेर हिँडाउन, सुँडले रिङ घुमाउन र क्यानभासमा चित्र बनाउन जस्ता कलाहरू सिकाएको देखिन्थ्यो । त्यसलाई लिएर जनावरप्रेमीहरूले चर्को विरोध गरेका थिए ।

तर, अहिले पनि यो काम जारी छ । जुन प्राय: लुकिछिपि हुने गरेको छ । केही पैसा कमाउने लोभमा व्यावसायीहरूले निर्दयी भएर जनावरहरूलाई अनावश्यक पीडा दिने गरेका हुन् ।

अस्ट्रेलियाको उक्त संस्थाका अनुसार जङ्गलमा हात्तीका आमाहरू आफ्नो बच्चासँग करिब पाँच वर्षसम्म बस्छन् । तर त्यही पुरानो भिडियोमा देखिएको बच्चालाई जन्मेको केही वर्षपछि नै आमाबाट छुट्याइएको थियो । त्यस भिडियोमा बच्चा छुट्टाएपछि हात्ती आमाको क्रन्दन पनि देखिन्थ्यो ।

त्यसरी बच्चालाई छुटाएपछि आमासँग कहिल्यै भेट्न हुँदैन । निर्ममतापूर्वक दिइएको तालिमका कारण हात्तीको बच्चामा गहिरो मानसिक चोट पुग्छ ।

दक्षिण-पूर्वी एसिया जाने धेरै पर्यटक हात्ती चढ्ने गर्छन् । तर त्यो सहित हात्ती नुहाउने जस्ता अन्य क्रियाकलापहरूमा पनि हात्तीलाई यसैगरी क्रसिङ नामक यातनापूर्ण तालिम दिएर तयार गरिन्छ ।

एक त हात्तीहरू जङ्गली जनावर हुन् । स्वभाविक रूपमा उनीहरू मानिसहरूसँग नजिक हुन चाहँदैनन् । तर मान्छेहरू हात्तीमा चढ्ने वा पानीको पोखरीमा हात्तीहरूको विभिन्न क्रियाकलाप हेर्ने गर्छ ।

थाइल्याण्डका धेरै पर्यटन कम्पनीहरूले अहिले पनि अनलाइनमा हात्ती सवारीको विज्ञापन गरिरहेको देखिन्छ ।

हात्तीलाई तालिम दिने कुरा व्यावसायीहरूले मिडियाबाट लुकाउने गर्छन् ।

त्यही भिडिओबारे थाइल्याण्डको चियाङ माई लोकल टुर नामक पर्यटन कम्पनीलाई सम्पर्क गरेर सोध्दा कुनै जवाफ नदिएको अस्ट्रेलियाको एबीसी न्युजले लेखेको थियो । तर पछि समाचार प्रकाशित गरेपछि भने त्यसका मालिक आन्चली कालम्पिचितले दुर्भाग्यवश त्यस्तो घटना हुन गएको भनेर बताएको एबीसी न्युजले जनकारी दिएको छ । साथै जनावरहरूलाई तालिम दिने व्यक्ति त्यसमा राम्रो जानकार नहुँदा पनि हात्तीले बढी पीडा सहनु परेको पनि आन्चलीले एबीसी न्युजलाई बताएकी थिइन् ।

यो समस्या थाइल्याण्डमा मात्र सीमित छैन । दक्षिण-पूर्वी एसियामा हात्तीमाथि यस्तो क्रुर व्यवहार सामान्य छ । वर्ल्ड एनिमल प्रोटेक्सनको सन् २०१८ को एक रिपोर्टले बाली जस्ता पर्यटकीय गन्तव्यहरूमा हात्ती, डल्फिन सहित अन्य जनावरमाथि दुर्व्यवहार हुने उजागर गरेको थियो ।

नेपालको चितवन सौराहा तिरका पर्यटन व्यावसायीहरूले पनि पर्यटकलाई हात्ती सवारी गराउने गर्छन् ।

आजकल भने वर्ल्ड एनिमल प्रोटेक्सन जस्ता संस्थाहरूले हात्तीलाई पर्यटनको नाममा जबरजस्ती पीडा दिने कुराको प्रतिरोध गर्दै आइरहेको छ ।