‘अवतार २’ बडादशैंमा विश्वभरि पुनः प्रदर्शनमा आउने

News Summary

Generated by OK AI. Editorially reviewed.

हलिउड फिल्म ‘अवतार २’ १६ असोजमा विश्वभर पुनः प्रदर्शनमा आउने भएको छ।
नेपालमा ‘अवतार २’लाई एप्पल इन्टरटेनमेन्टले रि-रिलिज गर्न लागेको हो।
‘अवतार २’ पुनः प्रदर्शनमा आउँदा दर्शकले तेस्रो श्रृंखलाको ट्रेलर पनि हेर्न पाउनेछन्।

काठमाडौं । हलिउडको बहुचर्चित फिल्म ‘अवतार २’ १६ असोजमा विश्वभरि पुनः प्रदर्शनमा आउने भएको छ ।

विजयादशमीको दिनमा विहिबार फिल्म रिलिज हुनेछ । यो फिल्मलाई नेपालमा एप्पल इन्टरटेनमेन्टले रि-रिलिज गर्न लागेको हो ।

४ पुसमा रिलिज हुन लागेको ‘अवतार’को बहुप्रतीक्षित तेस्रो श्रृंखला ‘फायर एण्ड एस’ रिलिजको अघि निर्माताले दोस्रो सिक्वेललाई पुनः प्रदर्शन गर्न लागेका हुन् ।

दोस्रो श्रृंखला नहेरेका दर्शकलाई हेर्ने अवसर दिलाउन र स्मृतिलाई ताजा तुल्याउन निर्माताले बजारीकरणको रणनीतिको हिस्साअनुसार यसलाई रि-रिलिज गर्न लागेका हुन् ।

यसअघि पनि दोस्रो भाग रिलिजअघि पहिलो भागको पुनः प्रदर्शन गरिएको थियो । रोचक के छ भने ‘अवतार २’ पुनः प्रदर्शनमा आउँदा दर्शकले तेस्रो श्रृंखलाको ट्रेलर समेत हेर्न पाउनेछन् ।

ट्रेलर नै आउने भएपछि दर्शकलाई हलसम्म तान्ने यो काइदा प्रभावकारी हुने अपेक्षा छ । जेम्स क्यामरुन निर्देशित फिल्म ‘अवतार’का फ्रेन्चाइजी विश्वभर सर्वाधिक कमाउने फिल्म हुन् ।

सन् २००९ मा रिलिज भएको ‘अवतार’को पहिलो भागले विश्वब्यापी २.९३ बिलियन अमेरिकी डलर कमाएको थियो । दोस्रो भागले २.३२ बिलियन अमेरिकी डलर कमाएको थियो ।