रेडिटमा सामाजिक सञ्जाल बन्दको हल्लीखल्ली, २३ भदौमा विरोध प्रदर्शन गर्ने

News Summary

Generated by OK AI. Editorially reviewed.

नेपाल सरकारले सूचीकरण नगरेका सामाजिक सञ्जालहरूमा बिहीबारदेखि प्रतिबन्ध लगाएको छ।
रेडिटमा जोडिएका युवाहरूले ८ सेप्टेम्बरमा भ्रष्टाचार विरुद्ध देशव्यापी प्रदर्शन गर्ने योजना बनाएका छन्।
प्रदर्शन बिहान ९ बजे संसद भवनअगाडि, पोखरामा सभाहलअगाडि र अन्य शहरका सरकारी कार्यालयअगाडि हुने बताइएको छ।

२० भदौ, काठमाडौं । सूचीकरण नगरेका भन्दै बिहीबारबाट नेपाल सरकारले थुप्रै सामाजिक सञ्जाललाई प्रतिबन्ध लगाएको छ । यसकै मध्येको एक हो रेडिट ।

रेडिटमा जोडिका युवाहरूले सरकारको विरोधमा प्रदर्शन गर्ने भएका छन् । नेपाल सोसल, नेपाल जस्ता कम्युनिटीमा जोडिएका युवाहरूले ८ सेप्टेम्बरमा भष्ट्रचार विरुद्ध देशव्यापी प्रदर्शन गर्ने बताइरहेका छन् ।

विभिन्न पोस्ट अनुसार त्यो दिन बिहानको ९ बजे संसद भवनअघि प्रदर्शन हुनेछ । पोखरामा सभाहलअघि र अन्य शहरहरूमा विभिन्न सरकारी कार्यालयअघि प्रदर्शन गर्ने भनिएको छ।

धेरैले रेडिटलाई वैकल्पिक सामाजिक सञ्जालको रूपमा लिन्छन् । बढी जसो युवापुस्ताले चलाउने रेडिटमा गुपचुप तरिकाले पोस्ट गर्न, कमेन्ट गर्न सकिन्छ ।

यही प्रकृतिको इन्डोनेसिया र फिलिपिन्सबाट उदाइरहेको भष्ट्रचार विरुद्धको आन्दोलनको पनि अहिले रेडिटमा व्यापक चर्चा छ । धेरै नेपाली प्रयोगकर्ताहरूले यसै गरी अहिले विभिन्न राजनीतिज्ञहरू, उनीहरूका सन्तानहरूको विलासी जीवनबारे उजागर गरिरहेका छन् ।

त्यस्तै फेसबुक, इन्स्टाग्राम लगायतका सामाजिक सञ्जाललाई प्रतिबन्ध गरेकोमा रेडिटमा युवाहरूले आक्रोश पोखिरहेका छन् ।