काभ्रेमा हेलिकप्टरबाट गर्भवतीको उद्धार

News Summary

Generated by OK AI. Editorially reviewed.

काभ्रेपलाञ्चोकको डाँडापारिस्थित खानीखोला गाउँपालिकाबाट १९ वर्षीया गर्भवती आयुष्मा भ्लोनलाई हेलिकप्टरमार्फत उद्धार गरिएको छ।
आयुष्मालाई सुत्केरी व्यथा लागेपछि तालढुंगा स्वास्थ्य चौकीमा भर्ना गरिएको थियो तर १८ घण्टासम्म सुत्केरी हुन नसकेपछि काठमाडौं पठाइएको छ।
डाँडापारी क्षेत्रमा वर्षातका कारण बाटो अवरुद्ध भएपछि हेलिकप्टरमार्फत उद्धार गर्नु परेको गाउँपालिका अध्यक्ष इन्द्रबहादुर थिङले बताए।

२२ भदौ, काभ्रेपलाञ्चोक । काभ्रेपलाञ्चोकको डाँडापारिस्थित खानीखोला गाउँपालिकाबाट सुत्केरी हुन नसकेकी एक गर्भवतीको हेलिकप्टरबाट उद्धार गरिएको छ ।

खानीखोला गाउँपालिकाका अध्यक्ष इन्द्रबहादुर थिङका अनुसार १९ वर्षीया गर्भवती महिला आयुष्मा भ्लोनको हेलिकप्टरमार्फत उद्धार गरिएको हो ।

आषुष्मालाई शनिबार बिहान १० बजे बजेदेखि सुत्केरी व्यथा लागेपछि तालढुंगा स्वास्थ्य चौकीमा भर्ना गरिएको थियो । तर आइतबार बिहानसम्म सुत्केरी हुन नसकेपछि हेलिकप्टरबाट उनको उद्धार गरिएको अध्यक्ष थिङले बताए ।

गर्भवती महिलाको स्वास्थ्य अवस्था बिग्रँदै गएका कारण हेलिकप्टरबाट उनको उद्धार गरी काठमाडौंको थापाथली स्थित परोपकार प्रसूति तथा स्त्रीरोग अस्पताल पठाइएको उनको भनाइ छ ।

भर्ना भएको १८ घण्टा बित्दा समेत सुत्केरी हुन नसकेपछि उनलाई काठमाडौं पठाइएको तालढुंगा स्वास्थ्य चौकीकी अनमी रञ्जु कोइरालाले जानकारी दिइन् ।

डाँडापारी क्षेत्रमा कच्चीसडक सञ्जाल मात्रै भएको र अहिले वर्षातको कारण बाटो अवरुद्ध भएर सवारी साधनसमेत चल्न नसकेकाले हेलिकप्टरमार्फत उद्धार गर्नु परेको अध्यक्ष थिङको भनाइ छ ।