घाइते जेनजी र उपचारमा खटिने स्वास्थ्यकर्मीलाई नि:शुल्क खाना [फोटोफिचर]

काठमाडौं । समानुभुती नेपालले अस्पतालमा उपचाररत घाइते र उपचारमा खटिएका स्वास्थ्यकर्मीलाई निःशुल्क खाना खुवाइरहेको छ । समानुभुती नेपालले यतिबेला निजामती (सिभिल) अस्पतालमा सबैभन्दा सक्रिय छ । सोमबार र मंगलबारको जेनजी प्रदर्शनका क्रममा अस्पतालमा भर्ना भएका घाइते र उपचारमा खटिएका चिकित्सक, स्वास्थ्यकर्मीका लागि संस्थाले निःशुल्क खानाको व्यवस्था गरेको हो ।

सिभिलमा बिरामीको चाप बढेको थाहा पाएपछि कोही भोकै नपरुन भन्ने सोचका साथ यहाँ आएको समानुभुती नेपालका संस्थापक तुलसी श्रेष्ठ बताए । उनका अनुसार यसमा नवदुर्गा पार्टी प्यालेसले सहयोग गरेको छ । खाना ल्याउनका लागि अस्पतालले नै एम्बुलेन्स उपलब्ध गराएको श्रेष्ठले जानकारी दिए ।

‘बिरामीहरू डिस्चार्ज नहुन्जेलसम्म नि:शुल्क खानाको सेवा निरन्तर चलाइने उनले बताए । हाल दैनिक बिहान-बेलुका करिब ५०० जनालाई खाना खुवाइएको श्रेष्ठले जानकारी दिए ।

अस्पतालमा दुःखद् परिस्थितिका बीच स्वास्थ्यकर्मीहरूलाई साथ दिने यो सहयोगी पहलले घाइते र सेवाप्रति समर्पित हातहरूलाई ठूलो राहत पुगेको छ ।

समानुभुती नेपालले विभिन्न संस्थासँग सहकार्य गर्दै अस्पतालमा निःशुल्क खाना खुवाउने अभियान चलाउँदै आएको छ । पहिले वीर अस्पतालमा, त्यसपछि राष्ट्रिय ट्रमा सेन्टर गरी अहिले यो अभियान काठमाडौं उपत्यकाका ५ अस्पतालमा जारी छ ।