कालापानी–लिपुलेक हाम्रो हो भन्ने अडानकै कारण सरकार ढालियो : मुख्यमन्त्री कँडेल

४ असोज, सुर्खेत । कर्णाली प्रदेशका मुख्यमन्त्री यामलाल कँडेलले देशको सार्वभौमसत्ता र भौगोलिक अखण्डता जोगाउने अडानकै कारण सरकार ढालिएको बताएका छन् । उनले चीन भ्रमणका क्रममा कालापानी, लिपुलेक र लिम्पियाधुरालाई नेपालको भूमि भएको स्पष्ट रूपमा उठाएपछि सत्तामा आँच आएको उल्लेख गरे ।

शनिबार राष्ट्रिय युवा संघ नेपाल र अनेरास्ववियुसँग सुर्खेतमा आयोजित अन्तरक्रियामा बोल्दै मुख्यमन्त्री कँडेलले यस्तो बताएका हुन् ।

‘चुच्चे नक्सामा देखिएको भूमि नेपालको हो भन्ने सत्य दाबी गर्दा जेनजी पुस्ताको नाम प्रयोग गरी आन्दोलन गराइयो र त्यसकै परिणामस्वरूप सरकार ढालियो,’ नेकपा एमाले स्थायी कमिटी सदस्य समेत रहेका कँडेलले भने ।

उनले राष्ट्रहितको पक्षमा उभिनु अपराध नभई गौरवको विषय भएको उल्लेख गर्दै युवा पुस्ताले यस विषयलाई निरन्तर उठाइरहनुपर्नेमा जोड दिए ।

‘देशको माटो बचाउन उठेका कदमलाई कमजोरीका रूपमा चित्रण गरेर सत्ता ढालिएको हो, तर इतिहासले यस्ता राष्ट्रवादी अडानलाई कहिल्यै नकार्दैन,’ कँडेलको भनाइ थियो ।

मुख्यमन्त्री कँडेलले वर्तमान अवस्थामा जेन्जी पुस्तालाई प्रगतिशील रूपमा संगठित गर्नुपर्ने आवश्यकता रहेको औंल्याए । उनले युवा संगठन र विद्यार्थी संगठनलाई मिलेर समाजलाई सकारात्मक दिशामा लैजान आह्वान समेत गरे । ‘हामी निर्माण गर्ने पुस्ता हौं, दर्शक बन्ने होइनौं । भ्रष्टाचारविरुद्ध आवाज उठाउने, राष्ट्रको पक्षमा बोल्ने र समाजलाई अनुशासित बनाउने जिम्मेवारी युवामाथि छ,’ उनले भने ।

मुख्यमन्त्री कँडेलले गुटबन्दी, विभाजन र स्वार्थी राजनीति गर्दा पार्टी मात्र कमजोर नभई राष्ट्रसमेत कमजोर हुने चेतावनी दिए । कार्यक्रममा नेकपा एमाले प्रदेश कमिटी अध्यक्ष गुलाबजंग शाह, सुर्खेत जिल्ला अध्यक्ष र युवाहरूको सहभागी रहेको थियो ।