अनमोल-जसिताले कालिम्पोङबाट थाले ‘जेरी अन टप’को प्रवर्धन

News Summary

Generated by OK AI. Editorially reviewed.

कलाकार अनमोल केसी र जसिता गुरुङले पश्चिम बंगालको कालिम्पोङमा फिल्म 'जेरी अन टप'को प्रचारप्रसार थालेका छन्।
उनीहरू शहीद मैदानमा हुने 'शहीद कप टुर्नामेन्ट २०२५'मा अतिथि बनेर सहभागी भएका छन्।
फिल्म 'जेरी अन टप' पूर्वोत्तर भारतमा रिलिज हुने तयारीमा छ र नयाँ गीत 'कस्तुरी' सोमबार युट्युबमा रिलिज हुनेछ।

काठमाडौं । कलाकार अनमोल केसी र जसिता गुरुङले भारतको पश्चिम बंगालस्थित कालिम्पोङबाट आगामी फिल्म ‘जेरी अन टप’को प्रचारप्रसार थालेका छन् ।

त्यहाँको शहीद मैदानमा आइतबार हुन लागेको ‘शहीद कप टुर्नामेन्ट २०२५’मा अनमोल-जसिता अतिथि बनेर पुगेका हुन् । उनीहरूसँगै फिल्म निर्देशक सुयोग गुरुङ पनि छन् ।

सोही क्रममा उनीहरूले आफूहरू अभिनित रोमान्टिक फिल्मको प्रचारप्रसार पनि गर्नेछन् । आइतबार बेलुका हुने प्रतियोगिताको फाइनलमा १० हजारभन्दा धेरै दर्शक सहभागी हुने अपेक्षा छ ।

नेपालीभाषी बहुल कालिम्पोङ नेपाली फिल्मको राम्रो बजार हो । कतिपय फिल्मले पश्चिम बंगाल र सिक्किममा राम्रो कमाइ गरेका थिए ।

‘जेरी अन टप’ प्रचारप्रसारको अर्थ, यो फिल्म पूर्वोत्तर भारतमा समेत रिलिज हुने तयारीमा रहेको बुझ्न सकिन्छ । पूर्वोत्तर भारतसँग अनमोलको निकटता देखिन्छ ।

बैशाख पहिलो साता उनले सिलिगुढीमा प्रशंसकसँग मिट एन्ड ग्रीट गरेका थिए । दर्शकसँग नजिकिने उनको त्यो पहिलो प्रयास थियो ।

‘जेरी अन टप’को कुरा गर्दा, यो फिल्म अनमोलको प्रतीक्षित फिल्ममध्ये पर्छ । यो फिल्मको नयाँ गीत ‘कस्तुरी’ सोमबार युट्युबमा रिलिज तयारीमा छ । यो गीतमा अनमोल र जसिताको अभिनय छ ।