क्षतिग्रस्त संरचनाको सरसफाइ र पुननिर्माणमा जुटिन् मिस नेपाल

News Summary

Generated by OK AI. Editorially reviewed.

मिस नेपाल लुना लुइँटेलले जेनजी आन्दोलनको क्रममा क्षतिग्रस्त स्वयम्भु प्रहरी चौकीको पुननिर्माणमा स्वयंसेवकसँग मिलेर काम गरेकी छिन्।
उनले इन्स्टाग्राममा ‘एक पटकमा एउटा इँटा । दिनको २०–३० मिनेट समर्पित गरे पनि, यदि हामी सँगै आयौं भने, हामी नेपालको पुनर्निर्माणमा फरक पार्न सक्छौं’ लेखेकी छिन्।
लुइँटेलले गतसाता मैतीदेवीमा जलेका सरकारी संरचना र स्वास्थ्य मन्त्रालयको सरसफाइमा पनि भाग लिएकी छिन्।

काठमाडौं । समाजसेवामा रुचि राख्ने मिस नेपाल लुना लुइँटेललाई यतिबेला भ्याइनभ्याइ छ । यी सुन्दरी यतिबेला जेनजी आन्दोलनको क्रममा क्षतिग्रस्त संरचनाको रङरोगन र पुननिर्माणको कार्यमा ब्यस्त छिन् ।

शनिबार उनले आगजानीबाट ध्वस्त स्वयम्भु प्रहरी चौकीको पुननिर्माणमा खटिएका स्वयंसेवकलाई सघाइन् । प्राप्त भिडियोमा उनले इट्टा र ब्लकहरू ओसार्ने काममा सघाएको देखिन्छ ।

नेपाल युथ क्लबले अहिले उक्त प्रहरी चौकीको रङरोगन र पुननिर्माणमा सघाइरहेको छ । क्लबका स्वयंसेवकसँग मिलेर लुनाले पनि सघाएको देख्न सकिन्छ ।

उनले इन्स्टाग्राममा भिडियो पोस्ट गर्दै लेखेकी छन्, ‘एक पटकमा एउटा इँटा । दिनको २०–३० मिनेट समर्पित गरे पनि, यदि हामी सँगै आयौं भने, हामी नेपालको पुनर्निर्माणमा फरक पार्न सक्छौं ।’

यसबाहेक, गतसाता नै लुनाले मैतीदेवीमा जलेका सरकारी संरचना र क्षतिग्रस्त स्वास्थ्य मन्त्रालयको सरसफाइमा भाग लिइन् । ‘मैले आफ्नो तर्फबाट के सहयोग गर्न सक्छु भनेर हेरिरहेको थिएँ । सो क्रममा सोसल मिडियाबाट काम भैरहेको देखेपछि सघाएकी हुँ’ लुनाले भनिन् ।

लुइँटेल जेनजी आन्दोलनको डेढसाताअघि मात्र मिस नेपाल २०२५ घोषित भएकी थिइन् ।