महामन्त्रीद्वयको हस्ताक्षर अभियानले पार्टी फुट्ने अवस्थामा पुग्नसक्छ : सिटौला

News Summary

Generated by OK AI. Editorially reviewed.

नेपाली कांग्रेसका नेता कृष्णप्रसाद सिटौलाले महामन्त्री गगन थापा र विश्वप्रकाश शर्माले चलाइरहेको हस्ताक्षर अभियानले पार्टी फुट्नसक्ने शंका व्यक्त गरे।
पार्टीमा विशेष महाधिवेशनको माग भइरहेको छ।
यस्तो बेलामा सिटौलाले पार्टीका नेताहरूलाई संगठनमा आगो लगाउने काम नगर्न आग्रह गरे।

२३ असोज, काठमाडौं । नेपाली कांग्रेसका नेता कृष्णप्रसाद सिटौलाले पार्टीका महामन्त्रीद्वय गगन थापा र विश्वप्रकाश शर्माले चलाइरहेको हस्ताक्षर अभियानले पार्टी फुट्ने अवस्थासम्म पुग्नसक्ने शंका गरेका छन् ।

बिहीबार बिहान आफ्नै निवासमा केही नेताहरूसँग छलफल गर्ने क्रममा उनले यस्तो बताएका हुन् । अहिले पार्टीका घरहरूमा मात्रै आगो लागेको भए पनि अब संगठनमै आगो लाग्ने बताए ।

‘अहिले दुईवटा महामन्त्रीले हस्ताक्षर अभियान चलाइरहेका छन् । यो हस्ताक्षर अभियानले पार्टीलाई फुट्ने अवस्थासम्म पुर्‍याइदिन सक्छ,’ उनले भने, ‘हस्ताक्षर अभियान गर्ने र नगर्ने भइसकेपछि गर्ने एउटा एकातिर, नगर्ने अर्कोतिर हुन्छ ।’

पार्टीमा विशेष महाधिवेशनको माग भइरहेका बेला दुई महामन्त्रीले थालेको हस्ताक्षर अभियानबारे पार्टीको केन्द्रीय समितिमा छलफल हुने बताइएको छ ।

यसैबीच सिटौलाले पार्टीका नेताहरूलाई भेला पारेर कम्तिमा संगठनमा आगो लगाउने काम नगर्न आग्रह समेत गरेका छन् ।

‘घरमा त आगो लाग्यो, अब पार्टी र संगठनमा पनि आगो लाग्छ । कम्तिमा संगठनमा आगो लगाउने काम कसैले नगरौं छ,’ उनले भनेका छन् ।

आफ्नो पार्टीभित्र निर्वाचनका बेलामा पनि बढी अन्तर्घात हुने गरेको भन्दै उनले सचेत पनि गराएका थिए ।