एकता रोक्न माग गर्दै माओवादी रुपान्तरणका लागि सुदनले राखे ५ प्रस्ताव

१६ कात्तिक, काठमाडौं । नेकपा माओवादी केन्द्रका नेता सुदन किराँतीले पार्टी रुपान्तरणका लागि पाँच प्रस्ताव अघि सारेका छन् । एकीकृत समाजवादीसँग पार्टी एकीकरणमा उपमहासचिव जनार्दन शर्माले असन्तुष्टि जनाइरहेको बेला किराँतीले पार्टी एकता रोक्नुपर्ने धारणा राखेका छन् ।

पार्टी, आन्दोलन र जेन–जी विद्रोहको भावना विपरीत एकता गर्न लागिएको किराँतीको ठहर छ । व्यक्तिको लागि एकता गर्न लागिएको उल्लेख गर्दै किराँतीले एकता अपूर्ण र अपवित्र भएको दाबी गर्दै रोक्नका लागि नेतृत्वसँग आग्रह गरेका छन् । भ्रष्टाचार सम्बन्धि मुद्दाको छानविन भइरहेको बेला पार्टी एकता तत्काल गर्न नहुने उनको तर्क छ ।

संरक्षकले आवश्यक हुँदा पार्टी विघटन गरी अधिवेशनको घोषणासम्म गर्न पाउने गरि  विधान संशोधन गरेर नयाँ संरचना निर्माण गरी अधिकार बाँडफाँड गर्नुपर्ने किराँतीको प्रस्ताव छ । पार्टी संयोजक प्रचण्डलाई  संरक्षक वा सर्वमान्य नेता बनाई पदाधिकारीलाई निर्देशक कमिटीमा बदल्न उनको सुझाव छ ।

स्थायी समितिदेखि पुराना नेताहरुको एक केन्द्रीय राजनीतिक समिति बनाएर राष्ट्रिय महत्वको निर्णय गर्नुपर्ने उनको विचार छ । उक्त समितिलाई सांसद छनोट गर्ने लगायतको अधिकार हुने गरी विधानमा व्यवस्था गर्न किराँतीको सुझाव छ ।

किराँतीको पाँचौ प्रस्ताव छ,‘तेश्रो पुस्तालाई कार्यकारी जिम्मेवारी दिउँ र  त्यो तेश्रो पुस्ताले पुलको भूमिका स्वरुप पुरानोको अनुभव र नयाँ (जेन–जी) पुस्ताको उर्जालाई जोडेर पार्टीलाई गति दिउँ वा अफ्ठ्यारोमा परेको पार्टीलाई उद्वार गरौं ।’