महिला क्रिकेटले नयाँ विश्वविजेता पाउँदै

१६ कात्तिक, काठमाडौं । महिला एकदिवसीय क्रिकेटको इतिहासमा पहिलोपटक न त अष्ट्रेलिया वा इंग्ल्यान्ड फाइनलमा छन्। यस पटकको विश्वकपले नयाँ विश्वविजेता पाउने निश्चित भइसकेको छ, जहाँ भारत र दक्षिण अफ्रिका आइतबार नवी मुम्बईस्थित डीवाई पाटिल स्टेडियममा उपाधि भिडन्तका लागि आमनेसामने हुँदै छन्।

गएको दशकमा धेरै चुनौती पार गरेका यी दुई टिमले यस पटक पनि कठिन परिस्थितिमा उत्कृष्ट पुनरागमन गरेका छन्। दक्षिण अफ्रिकाले समूह चरणमा ६९ र ९७ रनमै अलआउट हुने लज्जास्पद हारपछि आफूलाई पुनः स्थापित गरेको छ भने भारतले अंकतालिकामा शीर्ष तीन टोलीलाई नहराई पनि सेमिफाइनलसम्मको यात्रा तय गरेको थियो।

सेमिफाइनलमा भारतले घरेलु दर्शकको उत्साहबीच अष्ट्रेलियालाई हरायो भने दक्षिण अफ्रिकाले इंग्ल्यान्डविरुद्धको ‘हूडू’ तोड्दै फाइनलमा स्थान बनायो।

यसपटकको फाइनलले महिला क्रिकेटमा नयाँ अध्याय खोल्ने अपेक्षा गरिएको छ। दक्षिण अफ्रिकाका ननकुलुलेको म्लाबा र भारतकी क्रान्ति गौड जस्ता खेलाडीहरूका संघर्षमय यात्राले युवा पुस्तालाई प्रेरित गर्ने देखिन्छ।

दुवै देशमा अझै पनि महिलाको खेल तथा शिक्षामा पहुँचका चुनौतीहरू छन्, र यो फाइनल त्यस्ता सीमाना तोड्ने अवसरका रूपमा हेरिएको छ।

भारतले नवी मुम्बईमै लगातार तीन खेल जित्दै फाइनलसम्म पुगेको छ। घरेलु मैदानमा खेल्ने फाइदा भारतसँग छ भने दक्षिण अफ्रिकालाई यहाँ पहिलोपटक खेल्नुपर्ने चुनौती छ। ३० हजारभन्दा बढी दर्शकको उपस्थितिमा दक्षिण अफ्रिकाले वातावरणलाई नियन्त्रण गर्नुपर्नेछ।

मुख्य खेलाडीहरूमा फोकस

भारतकी विस्फोटक ओपनर शफाली वर्मा सेमिफाइनलमा छोटो इनिङ्स खेलेकी थिइन्, तर दक्षिण अफ्रिकाविरुद्ध उनले अघिल्लो विश्वकपमा ५३ रनको उत्कृष्ट प्रदर्शन गरेकी थिइन्। यसपटक पनि उनले भारतका लागि टोन सेट गर्ने अपेक्षा छ।

दक्षिण अफ्रिकाकी नाडिन डे क्लार्क ले लिग चरणमा भारतविरुद्ध ८४ रनको अविजित पारी खेल्दै सबैको ध्यान तानेकी थिइन्। उनी यो प्रतियोगितामा सबैभन्दा बढी स्ट्राइकरेट (१३६.६९) सहित उत्कृष्ट लयमा छिन्।

सम्भावित टिम

भारत: स्मृति मन्धाना, शफाली वर्मा, जेमिमा रोड्रिग्स, कप्तान हरमनप्रीत कौर, दीप्ति शर्मा, ऋचा घोष (विकेटकिपर), अमनजोत कौर, राधा यादव/स्नेह राना, क्रान्ति गौड, श्री चरनी, रेनुका सिंह।

दक्षिण अफ्रिका: लौरा वुल्भार्ड (कप्तान), ताज्मिन ब्रिट्स, एनीके बोश/मासाबाता क्लास, सुने लुस, मरिजान काप, सिनालो जाप्टा (विकेटकिपर), एनरी डर्कसेन, क्लोए ट्रायन, नाडिन डे क्लार्क, आयाबोङ्गा खाका, ननकुलुलेको म्लाबा।

पिच र मौसम

नवी मुम्बईमा खेलमैत्री पिच रहँदै आएको छ। यद्यपी नोभेम्बरमा समेत वर्षा भइरहेको छ र आइतबार साँझपछि पानी पर्ने सम्भावना छ। यदि खेल सम्पन्न हुन सकेन भने सोमबार रिजर्भ डेको व्यवस्था गरिएको छ।

रोचक तथ्यांक

-दक्षिण अफ्रिकाले भारतलाई पछिल्ला तीन विश्वकप भेटमा हराएको छ।

-भारत तेस्रो पटक विश्वकप फाइनल खेल्दैछ, तर अझै उपाधि जितेको छैन।

-दक्षिण अफ्रिकाले यस संस्करणमा सबैभन्दा बढी ३१ छक्का प्रहार गरेको छ।

-कप्तान लौरा वुल्भार्ड (४७० रन) ५०९ रनको कीर्तिमान पार गर्न ४० रन टाढा छिन्।

यी सबै पृष्ठभूमिबीच नवी मुम्बईमा हुने फाइनल केवल उपाधिको लागि होइन, महिला क्रिकेटको भविष्यका लागि ऐतिहासिक क्षण बन्ने अपेक्षा गरिएको छ।

-क्रिकइन्फोबाट