‘नेवानिलाई तीन भागमा छुट्याइ पुनर्संरचना गर्दा उत्तम’

News Summary

Generated by OK AI. Editorially reviewed.

सरकारले गठन गरेको उच्चस्तरीय आयोगले नेपाल वायुसेवा निगमलाई तीन भागमा छुट्याएर पुनर्संरचना गर्न सिफारिस गरेको छ।
आयोगले अन्तर्राष्ट्रिय उडानमा अनुभवी कम्पनीसँग व्यवस्थापन साझेदारी गर्न र ग्राउन्ड ह्यान्डलिङका लागि छुट्टै निकाय बनाउन सुझाव दिएको छ।
आन्तरिक उडानलाई छुट्टै सरकारी निकाय बनाइ थप जहाज खरिद गरी सञ्चालनमा ल्याउन आयोगले सिफारिस गरेको छ।

१९ कात्तिक, काठमाडौं । सरकारले गठन गरेको उच्चस्तरीय आयोगले नेपाल वायुसेवा निगम (नेवानि) लाई तीन भागमा छुट्याइ पुनर्संरचना गर्न सिफारिस गरेको छ ।

नागरिक उड्डयन क्षेत्र सुधारका लागि गठित उच्चस्तरीय अध्ययन एवं सुझाव आयोगले नेवानिलाई अन्तर्राष्ट्रिय उडान, आन्तरिक उडान र ग्राउन्ड ह्यान्डलिङ सेवा छुट्याएर नियमन गर्न भनेको छ । आयोगले अन्तर्राष्ट्रिय उडानमा अनुभवी अन्तर्राष्ट्रिय कम्पनीसँग व्यवस्थापन साझेदारीको समेत पहल गर्न भनेको छ ।

ग्राउन्ड ह्यान्डलिङमा छुट्टै निकाय बनाएर चुस्त सेवा दिनसमेत आयोगले सुझाव दिएको छ । यसका लागि कर्मचारीलाई अन्तर्राष्ट्रिय स्तरको सिप, दक्षता र कौशल प्रदान गर्नसमेत भनेको छ ।

आन्तरिक उडानलाई समेत छुट्टै सरकारी निकायका रूपमा विकास गर्ने र थप जहाज खरिद गरी सञ्चालनमा ल्याउन आयोगले सुझाव दिएको छ । निगम अहिले ५० अर्ब हाराहारी ऋणमा छ ।

उक्त ऋण लगानी समेत जोखिममा रहँदा पनि कसैले जिम्मेवारी नलिएकोमा आयोगले प्रश्न गरेको छ । अहिले नेवानिको आर्थिक अवस्था नै चिन्ताजनक स्थितिमा रहेको समेत आयोगको भनाइ छ ।