कुमारी बैंकले ल्यायो ग्रिन सेभिङ एकाउन्ट

News Summary

Generated by OK AI. Editorially reviewed.

कुमारी बैंकले दिगो विकास लक्ष्य प्राप्तिमा टेवा पुर्‍याउन 'ग्रिन सेभिङ डिपोजिट अकाउन्ट' योजना ल्याएको छ।
यस योजनामा खोलिने प्रत्येक खाताका लागि बैंकले एक रुख रोप्नेछ र निक्षेपकर्ताले ०.२५ प्रतिशत बढी ब्याज पाउनेछन्।
बैंकले संकलित निक्षेप दिगो विकास र पर्यावरण संरक्षणमा सकरात्मक प्रभाव पार्ने क्षेत्रमा कर्जा प्रवाह गर्ने जनाएको छ।

२६ कात्तिक, काठमाडौं । दिगो विकास लक्ष्य प्राप्तीमा राष्ट्रिय तथा अन्तर्राष्ट्रिय प्रतिबद्धतालाई आफ्नो सेवा, सुविधा, प्रक्रिया तथा व्यवसायिक साझेदारीमार्फत सघाउने उद्देश्यले कुमारी बैंकले ग्रिन सेभिङ डिपोजिट अकाउन्ट नामक निक्षेप योजना ल्याएको छ ।

‘एक खाता एक रुख’ सिद्धान्तमा आधारित यो योजना अन्तर्गत खोलिने हरेक खाता बापत एक रुख बैंकका तर्फबाट रोपिनेछ । ‘यसले प्रत्येक निक्षेपकर्ताको पर्यावरण संरक्षण तथा प्रवर्द्धनमा अप्रत्यक्ष रुपमा सहभागिता रहनेछ’ बैंकले भनेको छ ।

साथै खाता खोल्नेले विभिन्न थप सुविधा पनि पाउने बैंकले जनाएको छ । बैंकका अनुसार साधारण बचत खाताको भन्दा ०.२५ प्रतिशत अधिक ब्याजदर, एक लाख रुपैयाँसम्मको बीमा सुविधा, दुई वर्षसम्म निःशुल्क मोबाइल बैंकिङ सेवा, दुई लाखसम्मको फोनलोन सुविधा पाउने छन् ।

यस योजनाबाट संकलन हुने निक्षेपलाई दिगो विकास प्रवर्द्धन गर्ने, पर्यावरणलाई सकरात्मक प्रभाव पार्ने क्षेत्रहरूमा कर्जा प्रवाह गर्ने बैंकको भनाइ छ ।

प्रत्येक खाता बापत एक रुख रोपिने भएकोले यस अभ्यासबाट वातावरण संरक्षणमा दोहोरो योगदान पुग्ने बैंकिङ विभागका प्रमुख अर्पण पौडेलले बताए । बैंकका देशभर ३०२ शाखा सञ्जाल, ३१७ एटीएम, ५० एक्सटेन्सन काउन्टर तथा ४८ शाखारहित बैंकिङ इकाइ सञ्चालनमा छन् ।