प्रधानमन्त्रीका स्वकीय सचिवमाथि प्रश्न उठाउने जेनजी महान्यायाधिवक्ताबारे मौन

८ मंसिर, काठमाडौं । प्रधानमन्त्रीलाई भेट्न भन्दै सोमबार दिउँसो जेनजीका समूहहरू सिंहदरबार गेटमा पुगेका थिए ।

भित्र छिर्न नपाएपछि मिरज ढुंगाना समूहसहित केहीले सिंहदरबार गेटबाहिर मागपत्र टाँसेर हिँडे । द काउन्सिल अफ जेनजीसहित जेनजी मुभमेन्ट नेपालका केही सदस्य गेटभित्र छिरेर पनि प्रधानमन्त्री भेट्न पाएनन् ।

थरीथरी जेनजी समूहहरू सिंहदरबार पुग्नुको कारण थियो, आइतबार अनलाइनखबरमा प्रकाशित प्रधानमन्त्रीका प्रमुख स्वकीय सचिव आदर्श श्रेष्ठले पदीय दुरुपयोग गरेर श्रीमती र नातेदारलाई जागिर खुवाएको समाचार ।

नेपाल सरकारको सचिव सरहको सुविधा लिएका आदर्शले पत्नी संगीता श्रेष्ठलाई सहसचिव सरहको स्वकीय सहसचिव बनाएका थिए । कमला श्रेष्ठ सहितका केहीलाई पनि नियुक्त गरिएको कुरा बाहिर आएको थियो । असोज २ गते नै उनीहरूको नियुक्ति भएको थियो ।

यो समाचार बाहिरिएसँगै जेनजीका विभिन्न समूह तरंगित बने । सुशासन माग्दै आफूहरूले गरेको आन्दोलनको जगमा बनेको सरकारबाट यस्तो कल्पना नगरिएको उनीहरूको भनाइ छ । त्यसैले तत्काल श्रेष्ठलाई बर्खास्त गर्नुपर्ने माग उनीहरूको छ ।

प्रमुख स्वकीय सचिव आदर्शले परिवारका सदस्य र नातेदारलाई जागिर दिलाएको विषयमा नेपाल जेनजी फ्रन्टले विज्ञप्ति निकाल्दै आपत्ति जनायो । फ्रन्टले प्रधानमन्त्री समक्ष श्रेष्ठलाई पदमुक्त गरी उनले दिलाएका नियुक्ति खारेज गर्नुपर्ने लगायतका पाँच बुँदे माग राखेको छ ।

‘सुशासन र जवाफदेहिताको नाराको बलमा बनेको सरकारमा पुन: नातावाद र कृपावादमा आधारित नियुक्ति कसरी सम्भव भयो ?,’ जेनजी फ्रन्टले भनेको छ । उसले यस सम्बन्धमा प्रधानमन्त्री कार्यालयका तर्फबाट तत्काल स्पष्टीकरणसहित सत्यतथ्य जानकारी मागेको छ ।

यो पनि पढ्नुहोस

प्रधानमन्त्रीका प्रमुख स्वकीय सचिवले श्रीमतीसहितका नातेदारलाई दिलाए नियुक्ति

यो विषयमा जेनजी मुभमेन्ट अलायन्सले भने कुनै प्रतिक्रिया दिएको छैनन् । अमित खनाल (ऊर्जा), रिजन राना मगर, मोनिका निरौलालगायतले नेतृत्व गरिरहेको यो समूहले यो विषयमा अहिलेसम्म धारणा बनाएको छैन ।

यसमा एक सदस्यकाअनुसार यो समूहभित्र यसलाई लिएर कुनै छलफल भएको छैन । ‘अलि धेरै विज्ञप्तिबाजी यो भनेर हामीले निकालिरहेका छैनौँ । यसमा छलफल भएको मलाई थाहा छैन,’ ती अगुवाले भने, ‘यद्यपि, यो विषय (आदर्श श्रेष्ठ) को विषयमा मेरो खासै टिप्पणी छैन ।

बरु महान्यायधिवक्ता सबिता भण्डारीको हकमा भने उहाँलाई तत्काल बर्खास्त गर्नुपर्छ भन्ने हो, यो सामूहिक भन्दा पनि व्यक्तिगत टिप्पणीको रुपमा बुझ्नुहोला ।’

यो पनि पढ्नुहोस

प्रधानमन्त्रीमाथि प्रश्न : महान्यायाधिवक्ता भण्डारी राख्ने कि हटाउने ?

उनको कुराले यो समूहभित्र पछिल्लो समय सार्वजनिक भइरहेका यस्ता विषयमा कुनै टिप्पणी नगरिरहेको बुझ्न सकिन्छ ।

त्यस्तै, सुदन गुरुङ नेतृत्वको द काउन्सिल अफ जेनजी भने प्रधानमन्त्री सचिवालयसँग जोडिएको समाचारलाई लिएर असन्तुष्ट देखिन्छ । तत्काल प्रधानमन्त्रीले एक्सन लिनुपर्ने यो समूहको भनाइ छ ।

तर, सुदन समूहले विज्ञप्ति निकाल्नेतर्फ भन्दा पनि प्रधानमन्त्रीलाई नै प्रत्यक्ष भेटेर ध्यानाकर्षण गराउने योजना बनायो ।

सोहीअनुसार यो समूह सोमबार दिउँसो प्रधानमन्त्री कार्यालय पुग्यो । तर, योसँगै अन्य समूह पनि सँगसँगै पुगे । अरूभन्दा केही छिटो पुगेकाले यो समूहका सदस्य सिंहदरबार भित्र त छिरे, प्रधानमन्त्री भेटेर ध्यानाकर्षण गराउने योजना सफल भएन ।

‘हामी सिंहदरबार गयौँ । अब भोलि भेट्ने कुरा भएको छ,’ कोशी प्रदेश संयोजक उपार्जुन चाम्लिङले भने, ‘तर, त्यहाँ अन्य समूह पनि भएकाले के–के भयो भयो । बाहिर पनि अरू साथीहरूले अनेक गर्नुभयो । यिनै कारण आज हाम्रो पनि प्रधानमन्त्रीसँग भेट हुनसकेन ।’

सोमबार प्रधानमन्त्री भेट्न नपाएको यो समूहको योजना आदर्श श्रेष्ठलाई बर्खास्त गर्नुपर्ने माग राख्ने थियो । ‘हाम्रो आन्दोलनको दुरुपयोग गरेर आन्दोलनकै बेइज्जत गर्नेलाई त छोड्नुहुन्न । सुशासन मागेका हामीले यस्तो कल्पना गरेका थिएनौँ,’ द काउन्सिल अफ जेनजीका अगुवा अनिल बानियाँले भने ।

यता मिरज ढुंगानाहरू त आन्दोलनको तयारी नै गर्न थालेका छन् । सोमबार सिंहदरबारभित्र प्रवेशसमेत नपाएको यो समूह अब देशव्यापी आन्दोलनमा जाने तयारी गरिरहेको बताएको छ । प्रधानमन्त्री कार्कीको विकल्प नै खोज्ने तयारीस्वरुप आन्दोलन गर्न लागिएको यो समूहका अगुवाहरू बताउँछन् ।

महान्यायधिवक्ता प्रकरणमा जेनजी किन मौन ?

प्रधानमन्त्रीका स्वकीय सचिव आदर्श श्रेष्ठको सामाचारले तात्तिएका जेनजी महान्याधिवक्ता सविता भण्डारीको प्रकरणमा भने बोलेका देखिँदैनन् ।

डिम्बको अनधिकृत कारोबारको अभियोग लागेको होप फर्टिलिटी सेन्टरमा महान्यायाधिवक्ता सविता भण्डारीकै सेयर लगानी रहेको खुलेको थियो ।

होप फर्टिलिटीको सेयर लगतमा उल्लेख भए अनुसार सविता भण्डारी स्वयंको नाममा ४६ हजार कित्ता संस्थापक सेयर कायम रहेको देखिएको छ । कुल दुई करोड चुक्ता पूँजी रहेको यो कम्पनीमा उनको नाममा २३ प्रतिशत सेयर रहेको देखिन्छ । सो कम्पनीमा उनकी छोरी डा. प्रत्युषा बराल कार्यरत छिन् । होप फर्टिलिटीकी संस्थापक लगानीकर्तामा डिम्ब तस्करीको अभियोग लागेको डा. स्वस्ती शर्माको पनि लगानी छ ।

यो पनि पढ्नुहोस

एजेन्ट खटाएर कलेजमा किशोरी खोजिन्थ्यो, होप ल्याएर डिम्ब झिकिन्थ्यो

यसरी एउटा विषयलाई लिएर तात्तिएका जेनजीको अन्य विषयमा भने ध्यान गएको देखिएन । के जेनजीहरूले ‘सेलेक्टिभ मुद्दामा मात्र बोलिरहेका हुन् ? एउटा प्रकरणमा चर्को सुनिएका जेनजी त्योभन्दा गम्भीर अर्को प्रकरणमा किन मौन ?

जेनजी फ्रन्टका अगुवा युजन राजभण्डारीले अन्य विषयमा आफूहरूले अध्ययन गरिरहेकाले ती विषयमा पनि बोल्ने बताए ।

‘यो विषय एकाएक आएकोले यसरी बोलिहालेको हो । अन्य विषयमा नबोलेको भन्न मिल्दैन । त्यसमा पनि हामी अध्ययन गरिरहेका छौँ । जेहोस्, हरेक किसिमका अनियमितता भएको विषयमा सरकार जवाफदेही हुनुपर्छ भन्ने हाम्रो कुरा हो । अरु विषयमा कसरी अघि बढ्ने भनेर पनि हामी सल्लाह गर्छौँ,’ उनले भने ।

त्यस्तै, द काउन्सिल अफ जेनजीका प्रदेश संयोजक खेमराज साउदले भने आधिकारिक रुपमा पुष्टि भएका विषयमा आफूहरू बोलिरहेको बताए ।

उनकाअनुसार आदर्श श्रेष्ठको विषय आधिकारिक रुपमै पुष्टि भएकोले तत्काल आफूहरूको रियाक्सन आएको उनको भनाई छ । ‘अन्य विषयमा समाचार आइरहेपनि आधिकारिक रुपमा पुष्टि भएका छैनन् । त्यसैले हामीले यसमा यसरी बोलेका हौँ । अरु विषयमा पनि पुष्टि भएका दिन बोल्छौँ । यद्यपि, जे भएपनि सुशासनको हकमा सरकार जिम्मेबार बन्नुपर्छ भन्ने हाम्रो अडान हो,’ साउदले भने ।