गैरबैंकिङ सम्पत्ति सकार्दा बैंकले ३ पटक लिलाम प्रक्रिया पूरा गर्नैपर्ने

News Summary

Generated by OK AI. Editorially reviewed.

नेपाल राष्ट्र बैंकले बैंक तथा वित्तीय संस्थालाई धितो बिक्रीका लागि कम्तीमा ३ पटक लिलामी प्रक्रिया पूरा गर्नुपर्ने व्यवस्था गरेको छ।
धितो बिक्री नभएमा बैंकले धितोको बजार मूल्य वा कर्जा रकममध्ये कम मूल्यमा धितो स्वीकार गर्नुपर्ने छ।
धितोको बजार मूल्य कर्जा रकमभन्दा कम भएमा घाटा आर्थिक वर्षको नाफा/नोक्सानमा लेख्नुपर्ने छ।

२९ मंसिर, काठमाडौं । नेपाल राष्ट्र बैंकले धितो सकार गर्ने व्यवस्था थप कसिलो बनाएको छ ।

केन्द्रीय बैंकले बैंक तथा वित्तीय संस्थालाइ धितो सकार गर्दा ३ पटकसम्म बिक्री प्रयास प्रक्रिया पूरा गर्नुपर्ने व्यवस्था गरेको हो । यसअघि एक पटकको लिलाम प्रक्रियामा बिक्री नभए आफैंले सकार गर्दै आएका थिए ।

बैंक तथा वित्तीय संस्थाले कुनै कर्जा असुली नभए सुरक्षणमा रहेको धितो बेचबिखन गरी बाँकी साँवा र ब्याज उठाउन सक्छ । तर, कर्जा असुल गर्न कम्तीमा ३ पटकसम्म धितो लिलामी प्रक्रिया पूरा गर्दासमेत उक्त धितो बिक्री नभएको खण्डमा मात्र आफैंले सकार गर्नुपर्ने छ ।

सकार गर्दा धितोको प्रचलित बजार मूल्य वा धितो सकार गर्न अघिल्लो दिनसम्मको सम्पूर्ण लेना रकममध्ये जुन कम हुन्छ, सोही मूल्यमा मूल्यांकन गर्नुपर्ने छ ।

यदि धितोको बजार मूल्य कर्जाको लेना रकमभन्दा कम भए कम भएजति रकम सोही आर्थिक वर्ष नाफा/नोक्सान हिसाबमा खर्च लेख्ने बेहोरा लेखा नीतिमा उल्लेख गर्नुपर्ने छ ।

तर, यसरी मूल्यांकन गर्दा त्यस्तो गैरबैंकिङ सम्पत्ति बापत रकम सम्पूर्ण रूपमा हिसाब मिलान नभएसम्म लेना रकममध्ये ब्याज रकमलाई नाफा/नोक्सान हिसाबमा आम्दानी जनाउन पाइने छैन । त्यस्तो रकमलाई गैरबैंकिङ सम्पत्ति बापत नोक्सानी व्यवस्थामा सार्नुपर्ने छ ।