अब सबै भन्सार कार्यालयमा अनलाइन मूल्यांकन प्रणाली

News Summary

Generated by OK AI. Editorially reviewed.

अर्थमन्त्री रामेश्वर खनालले २० पुसदेखि सबै भन्सार कार्यालयमा अनलाइन मूल्यांकन डाटाबेस प्रणाली कार्यान्वयन गरेको घोषणा गरे।
यो प्रणाली विराटनगरबाट सुरु भई १८ भन्सार कार्यालयमा भर्चुअल माध्यमबाट एकसाथ लागु गरिएको छ।
खनालले भन्सारमा जीएटीटी मूल्यांकन प्रणाली पूर्णरूपमा लागु भई सन्दर्भ मूल्यको सट्टा कारोबार मूल्य लागु भएको बताए।

२० पुस, काठमाडौं । अब सबै भन्सार कार्यालयमा अनलाइन मूल्यांकन डाटाबेस प्रणाली कार्यान्वयनमा आएको छ ।

अर्थमन्त्री रामेश्वर खनालले कार्यभार सम्हाले लगत्तै अनलाइन डाटाबेस प्रणाली कार्यान्वयन सुरु गरेका थिए । सुरुमा विराटनगर भन्सारबाट सुरु यो प्रणाली शुक्रबारदेखि सबै भन्सार कार्यालयमा सुरु गरिएको हो ।

यसको घोषणा पूर्वअर्थमन्त्री विष्णु पौडेलले नै गरेका थिए । तर, कार्यान्वयनमा आउन सकेको थिएन । अर्थमन्त्री खनालले भर्चुअल माध्यमबाट एकसाथ १८ भन्सार कार्यालयमा यस्तो प्रणाली सुरु गरेका हुन् ।

भन्सार व्यवस्थापन गोष्ठी उद्घाटन गर्दै अर्थमन्त्री खनालले लामो समयदेखि भन्सारमा जीएटीटी मूल्यांकन प्रणाली पूर्णरूपमा लागु भएको र अब सन्दर्भ मूल्यका सट्टा कारोबार मूल्यलाई लागु गरिएको बताए ।

उनले वस्तुको मूल्य बजारले निर्धारण गर्ने भन्दै प्रक्रियागत सरलीकरणमा जोड दिए । उनले आगामी दिनमा भन्सारलाई उत्पादन र निर्यातमा आधारित अर्थतन्त्र निर्माणको मेरुदण्डका रूपमा विकास गरिनुपर्ने समेत बताए ।

निजी क्षेत्रले नक्कली बिल–बिजक जारी गर्नुपर्ने बाध्यता अन्त्य गर्दै व्यवसायी यो परिवर्तन अनुरूप वास्तविक कारोबार र सही कागजात मात्र पेस गरी इमानदार हुनुपर्ने बताए ।