प्रधानमन्त्रीको दबाबपछि कुलमानले भने : राजीनामा समयमै दिन्छौँ

News Summary

Generated by OK AI. Editorially reviewed.

ऊर्जामन्त्री कुलमान घिसिङले समय आएपछि पदबाट राजीनामा दिने प्रतिक्रिया दिएका छन्।
प्रधानमन्त्री सुशीला कार्कीले राजनीतिक दलसँग आवद्ध मन्त्रीहरूलाई तत्काल राजीनामा दिन निर्देशन दिएकी थिइन्।
कुलमान घिसिङ उज्यालो नेपाल पार्टीको संरक्षक हुन् र राजनीतिक गतिविधिमा सक्रिय छन्।

२२ पुस, काठमाडौं । ऊर्जामन्त्री कुलमान घिसिङले समयमै राजीनामा दिने प्रतिक्रिया दिएका छन् । सोमबारको मन्त्रिपरिषद् बैठकमा प्रधानमन्त्री सुशीला कार्कीले राजनीतिक दलसँग आवद्ध भएका मन्त्रीहरूलाई पदबाट राजीनामा दिएर जान निर्देशन दिएको विषयमा मंगलबार पत्रकारहरूले सोधेको प्रश्नमा घिसिङले यस्तो प्रतिक्रिया दिएका हुन् ।

उनले भने, ‘समय आएपछि दिन्छौँ ।’ त्यसपछि पत्रकारले सोधे- राजीनामा चाहिँ दिने नै हो ? सोधपछि उनले भने- हो ।

चुनाव नजिकिँदै जाँदा केही मन्त्रीहरू राजनीतिक क्रियाकलापमा लागेको र उनीहरू दलमा नै आबद्ध भएकाले प्रधानमन्त्री कार्कीले सोमबारको बैठकमा अब तत्काल पद छोड्न भनेकी थिइन् ।

सरकारमा सहभागी भएपछि कुलमान घिसिङको संरक्षकत्वमा उज्यालो नेपाल पार्टी गठन गरिएको थियो ।

अध्यक्ष अनुपकुमार उपाध्याय रहेको उज्यालो नेपाल पार्टीले राष्ट्रिय स्वतन्त्र पार्टी (रास्वपा)सँग एकता गरेको छ । दलका बैठक र राजनीतिक कार्यक्रममा भने घिसिङ प्रत्यक्ष सहभागी हुँदै आएका छन् ।

निर्दलीय भनिएको चुनावी सरकारका मन्त्री नै राजनीतिक गतिविधिमा सक्रिय हुन थालेको भन्दै आलोचना हुँदै आएको छ ।