आम्दानीको पाँच प्रतिशत बजेट अनुसन्धानमा खर्च गर्नुस् : उपकुलपति अर्याल

१९ माघ, काठमाडौं । त्रिभुवन विश्वविद्यालयका उपकुलपति प्रा.डा. दीपक अर्यालले क्याम्पसहरूलाई आम्दानीको पाँच प्रतिशत बजेट अनुसन्धानमा खर्च गर्न आग्रह गरेका छन् ।

सोमबार पशुपति बहुमुखी क्याम्पसको ४६ औँ वार्षिकोत्सव समारोहमा उनले न्युनतम साढे दुईदेखि पाँच प्रतिशतसम्म बजेट अनुसन्धानमा खर्च गर्न आग्रह गरेका हुन् ।

उनले विश्वविद्यालयका आंगिक क्याम्पसहरूलाई पाँच प्रतिशत बजेट अनिवार्य रूपमा अनुसन्धानमा खर्च गर्न निर्देशन दिइसकिएको जानकारी दिए । अनुसन्धानमा बजेट खर्च गर्ने प्रयोजनका लागि विश्वविद्यालयले क्याम्पसहरूलाई औपचारिक पत्र पठाउने तयारी समेत गरेको उनले बताए ।

पशुपति क्याम्पसलाई अनुसन्धान केन्द्रका रूपमा विकास गर्न पनि आग्रह गर्दै उनले यसले सिंगो त्रिभुवन विश्वविद्यालयको शैक्षिक स्तर उकास्न सहयोग पुग्ने बताए ।

‘पशुपति क्याम्पसलाई अनुसन्धान केन्द्र भनेर विकास गरिदिनुहोला । यसले सिंगो त्रिभुवन विश्वविद्यालयलाई नै स्तरोन्नतिको लागि सहयोग पुग्नेछ । विश्वविद्यालयले पत्र पनि पठाउँछ, कम्तीमा आफ्नो आम्दानीको केही प्रतिशत बजेट अनुसन्धानमा खर्च गरिदिनुहोला,’ उनले भने, ‘कम्तीमा पनि साढे दुई प्रतिशत, हामीले विश्वविद्यालयका आंगिक क्याम्पसहरूलाई पाँच प्रतिशत अनिवार्य गरेका छौं । तपाईंहरूको आफ्नो आर्थिक आय आर्जन र आय क्षमताअनुसार कम्तिमा पनि साढे दुई देखी पाँच प्रतिशत आम्दानीको रकम अनुसन्धानको लागि खर्च गरिदिनुहोला ।’

एनाक अनुसार विश्वविद्यालयका सम्पूर्ण अभिलेखहरू डिजिटल रूपमा सुरक्षित गर्ने उद्देश्यसहित डिजिटाइजेशन प्रक्रिया शुरु भइसकेको छ । यसका लागि आवश्यक सफ्टवेयर खरिद गर्न टेण्डर आह्वान गरिएको उनले जानकारी दिए ।

‘हामीले अहिले दुई वटा कार्यक्रमहरू ल्याएका छौं, एउटा चाहिँ डिजिटलाईजेशन गर्ने, विश्वविद्यालयको सम्पुर्ण अभिलेखहरू डिजिटल रुपमा कायम गर्ने भनेर शुरुवात गरिसकेका छौं । आवश्यक सफ्वयेरहरूको टेण्डर आह्वान भइसकेको छ । यसमा तपाईंहरू पनि जोडिनुपर्ने हुनसक्छ । त्यसपछि विश्वविद्यालयलाई रि–स्टक्चर गर्नेछौं,’ उनले भने ।