राष्ट्रिय प्रत्यारोपण केन्द्रले विविध कार्यक्रम गरी मनायो विश्व मिर्गौला दिवस

२८ फागुन, काठमाडौं । भक्तपुरस्थित शहीद धर्मभक्त राष्ट्रिय प्रत्यारोपण केन्द्रले विश्व मिर्गौला दिवस २०२६ विविध कार्यक्रम गरी मनाएको छ । विश्व मृगौला दिवस प्रत्यक वर्ष अंग्रेजी क्यालेन्डर अनुसार मार्च महिनाको दोस्रो बिहीबार मनाइन्छ । यस वर्ष विश्व मिर्गौला दिवसको नारा ‘सबैका लागि मिर्गौला स्वास्थ्य- मानिसहरूको हेरचाह, ग्रहको रक्षा’ भन्ने रहेको छ ।

यस अवसरमा राष्ट्रिय प्रत्यारोपण केन्द्रले बिहीबार बिहान मिर्गौला पदयात्राको आयोजना गरेको थियो । जसमा दुधपास्थित केन्द्रबाट सुरू भएको र्‍याली नपुखु हुँदै भक्तपुर दरबार स्क्वायर– साकोठा– टौमडी –पोटरी स्क्वायर–नासमना–बंशगोपाल–तेखापुखु–भार्वाचो– भक्तपुर मिनी बस पार्क हुँदै पुनः केन्द्रमा फर्किएको थियो ।

केन्द्रको प्रांगणमा स्वास्थ्य तथा जनसंख्या मन्त्री सुधा शर्मा गौतमको प्रमुख आतिथ्यमा औपचारिक कार्यक्रम समेत आयोजना भएको थियो ।

कार्यक्रममा बोल्दै केन्द्रका कार्यकारी निर्देशक डा. कल्पना कुमारी श्रेष्ठले मिर्गौला उपचारको क्षेत्रमा यो केन्द्र देशकै नमुना अस्पतालका रूपमा स्थापित भएको बताइन् । अहिलेसम्म १५८६ जनाको मिर्गौला र ३६ जनाको कलेजो प्रत्यारोपण भएको जानकरी उनले दिइन् ।

डा‍. कल्पनाका अनुसार केन्द्रमा हाल दैनिक १५० को हाराहारीमा डाइलाइसिस सेवा उपलब्ध हुने गरेको छ । अत्यन्त साँघुरो स्थानबाट सञ्चालन हुँदा केन्द्रको सेवा विस्तार गर्न नसिकएको गुनासो उनले गरिन् । उचित स्थानमा जग्गा उपलब्ध गराउन सम्बन्धित सबैमा अनुरोध समेत उनले गरिन् ।

स्वास्थ्य तथा जनसंख्या मन्त्री सुधा शर्माले आफू स्वास्थ्य सचिव हुँदा यस केन्द्रको परिकल्पना गरेको कुरा स्मरण गराइन् । राष्ट्रिय प्रत्यारोपण केन्द्रले चलाएको अभियानको उनले प्रशंसा गरिन् । प्रत्यारोपण केन्द्रका लागि जग्गा उपलब्ध गराउनका लागि आफू पदमा रहँदा वा नरहँदा पनि पहल जारी राख्ने प्रतिवद्धता जनाइन् ।

यसै कार्यक्रममा बोल्ने अतिथिहरूले यस्ता प्रकारका जनचेतनमूलक कार्यक्रमले मिर्गौला रोगको बारेमा सर्वसाधारणमा सचेतना फैलाउन प्रभावकारी भूमिका निर्वाह गर्ने बताए । यस्तो प्रकारको अभियानमा सधैं साथ दिएको र आगामी दिनमा पनि केन्द्रको उन्नती र प्रगतिमा साथ र सहयोग पुर्‍याउने प्रतिवद्धता जनाए ।

कार्यक्रममा स्वास्थ्य तथा जनसंख्या मन्त्रालयका विशिष्ट व्यक्तित्वहरु, जिल्ला प्रशासन कार्यालय भक्तपुरका प्रमुख जिल्ला अधिकारी लगायतको उपस्थिति थियो ।साथै भक्तपुर अस्पताल, भक्तपुर क्यान्सर अस्पताल र अन्य अस्पतालका प्रत्यारोपण क्षेत्रमा ख्यातिप्राप्त व्यक्ति, विभिन्न अस्पतालका स्वास्थ्यकर्मी, अङ्ग फेल भएका विरामी तथा प्रत्यारोपित व्यक्ति गरी करिब ६०० जनाको उपस्थिति थियो ।